ലോക് ജനശക്തി പാർട്ടി എംപി പ്രിൻസ് രാജ് പസ്വാനെതിരെ ഡൽഹി പോലീസ് പീഡന കേസ് രജിസ്റ്റർ ചെയ്തു. എൽജെപി പ്രവർത്തകയായ യുവതി നൽകിയ പരാതിയിലാണ് കേസ് രജിസ്റ്റർ ചെയ്തത്.
2020ൽ ഡൽഹി ജനപഥിൽ വച്ച് പ്രവർത്തകയുമായി പരിചയപ്പെടുകയും തുടർന്ന് നിരന്തരം ശാരീരികമായി ഉപദ്രവിക്കുകയും ചെയ്തെന്ന് പരാതിയിൽ പറയുന്നു. ശേഷം ഇരുവരും തമ്മിലുള്ള വീഡിയോ വെച്ച് ഭീഷണിപ്പെടുത്തുകയായിരുന്നെന്ന് യുവതി പോലീസിൽ പരാതിപ്പെട്ടു.
എൽജെപി മുതിർന്ന നേതാവ് ചിരാഗ് പസ്വാനെ പരാതി അറിയിച്ചെന്നും പോലീസിൽ പരാതിപ്പെടാതിരിക്കാൻ പ്രേരിപ്പിച്ചെന്നും യുവതി മൊഴി നൽകി. എന്നാൽ അദ്ദേഹം ഇടപെട്ടിട്ടും പ്രശ്നത്തിന് പരിഹാരം കാണാഞ്ഞതിനാലാണ് പോലീസിനെ സമീപിച്ചതെന്ന് യുവതി പറഞ്ഞു.
ഇതേതുടർന്ന് 2020ൽ പാർട്ടി വിട്ട യുവതിയെ പിന്നീട് 14 മണിക്കൂറുകളോളം തടങ്കലിൽ വെച്ചെന്നും തെളിവുകൾ നശിപ്പിച്ചെന്നും യുവതി ആരോപിച്ചു. ഡൽഹി കോടതിയുടെ ഉത്തരവ് പ്രകാരമാണ് പസ്വാനെതിരെ പോലീസ് കേസെടുത്തത്.
Story Highlights: Rape case filed against Prince Raj Paswan MP.
