അഫ്ഗാനിസ്ഥാനിലെ ഇന്ത്യക്കാരുടെ കണക്കുകൾ കൃത്യമായി ലഭ്യമല്ലെന്ന് കേന്ദ്ര വിദേശകാര്യ മന്ത്രാലയം വിശദീകരിച്ചു. അഫ്ഗാനിൽ നിന്നും തിരിച്ച് ഇന്ത്യയിലേക്ക് മടങ്ങാൻ ആഗ്രഹിക്കുന്ന കുറച്ചുപേർ മാത്രമാണ് ഇനിയും അഫ്ഗാനിലുള്ളതെന്ന് അനുമാനിക്കുന്നതായി വിദേശകാര്യ മന്ത്രാലയം അറിയിച്ചു.
അഫ്ഗാനിലെ സാഹചര്യങ്ങൾ നിരീക്ഷിക്കുന്നുണ്ടെന്നും ഭയപ്പെടേണ്ട സാഹചര്യമില്ലെന്നും വിദേശ കാര്യ വക്താവ് അറിയിച്ചു. ഇന്ത്യൻ പൗരന്മാരെ മാത്രമല്ല അഫ്ഗാൻ പൗരന്മാരെയും മറ്റു പൗരന്മാരെയും ഇന്ത്യയിലേക്ക് സ്വീകരിക്കുന്നതായും അദ്ദേഹം പറഞ്ഞു. എന്നാൽ ഇന്ത്യൻ പൗരൻമാർക്കാണ് മുൻഗണന എന്നും വിദേശകാര്യ മന്ത്രാലയം വ്യക്തമാക്കി.
260 ഇന്ത്യക്കാർ ഉൾപ്പെടെ ആകെ 550 പേരെ താലിബാൻ നിയന്ത്രണത്തിലുള്ള കാബൂളിൽ നിന്നും ഇന്ത്യ രക്ഷിച്ചതായാണ് റിപ്പോർട്ടുകൾ. ആറു മാസത്തേക്കുള്ള അടിയന്തര ഇ-വിസ അഫ്ഗാൻ അഭയാർഥികൾക്കായി ഇന്ത്യ നൽകുന്നുണ്ട്.
Story Highlights: Central Govt. didn’t have accurate data about Indians trapped in Afghanistan.
