കൊങ്കൺ പാതയിൽ വീണ്ടും മണ്ണിടിച്ചിൽ ഉണ്ടായി, ട്രെയിൻ ഗതാഗതം തടസ്സപ്പെട്ടു. രത്നഗിരി ജില്ലയിലെ റെയിൽവേ ട്രാക്കിലേക്കാണ് മണ്ണിടിഞ്ഞ് വീണത്. ഇന്ന് വൈകുന്നേരം അഞ്ച് മണിയോടെ വിൻഹെരെ (റായ്ഗഡ്), ദിവാൻ ഖാവതി (രത്നഗിരി) സ്റ്റേഷനുകൾക്കിടയിലുള്ള തുരങ്കത്തിന് അടുത്താണ് മണ്ണിടിച്ചിൽ സംഭവിച്ചത്. കനത്ത മഴയാണ് ഇതിന് കാരണമായത്.
ഗതാഗതം തടസ്സപ്പെട്ടതിനെ തുടർന്ന് അഞ്ച് ട്രെയിനുകൾ വഴിതിരിച്ചുവിട്ടു. 16345 ലോകമാന്യ നിലക് – തിരുവനന്തപുരം നേത്രാവതി എക്സ്പ്രസ് കല്യാൺ – ലോണാവാല – ജോലാർപേട്ട – പാലക്കാട് – ഷൊർണൂർ വഴി സർവീസ് നടത്തും. ഹസ്രത്ത് നിസാമുദ്ദീൻ എറണാകുളം എക്സ്പ്രസ്സ്, എൽടിടി തിരുവനന്തപുരം എക്സ്പ്രസ്, ഗാന്ധിധാം നാഗർകോവിൽ എക്സ്പ്രസ്സ് എന്നിവയും വഴി തിരിച്ചുവിട്ടു.
കഴിഞ്ഞ ആഴ്ച്ചയിലും കൊങ്കൺ പാതയിൽ ട്രെയിൻ ഗതാഗതം തടസ്സപ്പെട്ടിരുന്നു. ഇപ്പോൾ ട്രെയിനുകളുടെ സമയക്രമമെല്ലാം തെറ്റിയാണ് പാതയിൽ വണ്ടികൾ ഓടുന്നത്. തുടർച്ചയായ മണ്ണിടിച്ചിലുകൾ കൊങ്കൺ പാതയിലെ യാത്രക്കാർക്ക് വലിയ ബുദ്ധിമുട്ടുകൾ സൃഷ്ടിക്കുന്നുണ്ട്.
