തിരുവനന്തപുരം അതിവേഗ പ്രത്യേക കോടതി ജഡ്ജി ആർ രേഖ, 11 വയസ്സുകാരനെ പീഡിപ്പിച്ച കേസിൽ കാലടി താമരം സ്വദേശി ഷിബു (46) നെ അഞ്ചുവർഷം കഠിനതടവിനും 10,000 രൂപ പിഴയ്ക്കും ശിക്ഷിച്ചു. പിഴ തുക കുട്ടിക്ക് നൽകണമെന്നും, അടച്ചില്ലെങ്കിൽ രണ്ടുമാസം കൂടുതൽ തടവ് അനുഭവിക്കണമെന്നും കോടതി നിർദ്ദേശിച്ചു.
2022 നവംബർ 19 ന് രാവിലെ 11.30 മണിക്ക് കുട്ടി അനിയന് വേണ്ടി ലെയ്സ് വാങ്ങാൻ കടയിൽ പോയപ്പോഴാണ് സംഭവം നടന്നത്. സിഗരറ്റ് വാങ്ങാൻ വന്ന അയൽവാസിയായ പ്രതി, കുട്ടിയുടെ പുറകിൽ നിന്ന് കൈകൾ ബലമായി പിടിച്ചുവെച്ച് സ്വകാര്യഭാഗത്ത് പിടിച്ചു. വേദനിച്ച കുട്ടി കരഞ്ഞുകൊണ്ട് വീട്ടിലേക്ക് ഓടി. വൈകുന്നേരം വേദന മാറാത്തതിനാൽ കുട്ടി അമ്മയോട് സംഭവം പറഞ്ഞു. രാത്രി തന്നെ വീട്ടുകാർ ഫോർട്ട് പോലീസിനോട് പരാതിപ്പെട്ടു.
പ്രോസിക്യൂഷൻ വേണ്ടി സ്പെഷ്യൽ പബ്ലിക് പ്രോസിക്യൂട്ടർ ആർഎസ്. വിജയ് മോഹനും അഡ്വ. അതിയന്നൂർ അർ. വൈ. അഖിലേഷും ഹാജരായി. 14 സാക്ഷികളെ വിസ്തരിക്കുകയും 17 രേഖകൾ ഹാജരാക്കുകയും ചെയ്തു. ഫോർട്ട് അസിസ്റ്റൻറ് കമ്മീഷണർ എസ്. ഷാജിയും എസ്ഐ സജിനി റ്റിയും ആണ് കേസ് അന്വേഷിച്ചത്. പ്രതിയുടെ ഇടത് കൈക്ക് വൈകല്യമുണ്ടെന്നും, ആ കൈ വച്ച് കുട്ടിയുടെ കൈകൾ പിന്നിലേയ്ക്ക് പിടിച്ചുവെച്ചിട്ട് മറ്റേ കൈ വെച്ചാണ് കുട്ടിയുടെ സ്വകാര്യ ഭാഗത്തു പിടിച്ചതെന്നും റിപ്പോർട്ടിൽ പറയുന്നു.
Story Highlights: 11-year-old boy molested in Kerala, accused sentenced to 5 years imprisonment and fined Rs 10,000
