അന്നാ സെബാസ്റ്റ്യൻ്റെ മരണം: ചോർന്ന കത്തിൽ EY കമ്പനി അന്വേഷണം തുടങ്ങി

അമിത ജോലി ഭാരത്തെ തുടർന്ന് പൂനെയിൽ കുഴഞ്ഞുവീണ് മരിച്ച അന്നാ സെബാസ്റ്റ്യൻ്റെ അമ്മ അയച്ച കത്ത് ചോർന്നതിൽ EY കമ്പനി ആഭ്യന്തര അന്വേഷണം ആരംഭിച്ചു. കമ്പനിയുടെ ചെയർമാൻ ഉൾപ്പെടെ 7 പേർക്കാണ് ഔദ്യോഗികമായി കത്ത് നൽകിയിരുന്നതെങ്കിലും, ഇത് മാധ്യമങ്ങൾക്ക് എത്തിയതിന്റെ കാരണം അന്വേഷിക്കും. മകളുടെ മരണത്തിന് കാരണം ഓഫീസിലെ ജോലി ഭാരവും സമ്മർദ്ദവുമാണെന്ന് കാട്ടി ഏൺസ്റ് ആൻഡ് യങ് ഇന്ത്യ മേധാവി രാജീവ് മേമാനിക്ക് അന്നയുടെ അമ്മ അയച്ച കത്ത് പുറത്തായതോടെയാണ് വിഷയം ചർച്ചയായത്.

ഇക്കഴിഞ്ഞ മാർച്ചിലാണ് അന്ന കമ്പനിയുടെ ഭാഗമായത്. EY ഗ്ലോബലിന്റെ അനുബന്ധ കമ്പനിയായ എസ്സാർ ബാറ്റ്ലിബോയ് കമ്പനിയിലായിരുന്നു അവർ ജോലി ചെയ്തിരുന്നത്. ഈ ടീമിൽനിന്ന് ജോലി സമ്മർദ്ദം കാരണം നിരവധി പേർ രാജിവെച്ചു പോയിരുന്നു. ജൂലൈ 20 നാണ് കൊച്ചി കങ്ങരപ്പടി സ്വദേശിനിയായ അന്ന ഹൃദയാഘാതത്തെ തുടർന്ന് മരിച്ചത്. അന്നയുടെ മരണത്തിൽ വെളിപ്പെടുത്തലുമായി സുഹൃത്ത് ആൻമേരിയും രംഗത്തുവന്നു.

ജോലിഭാരം അന്നയെ തളർത്തിയിരുന്നുവെന്നും 18 മണിക്കൂർ വരെ ജോലി ചെയ്തിരുന്നുവെന്നും ആൻമേരി പറഞ്ഞു. ശനി, ഞായർ ദിവസങ്ങളിലും അവധിയില്ലാതെ ജോലിയെടുത്തിരുന്നതായും, നാല് മണിക്കൂർ മാത്രമേ ഉറങ്ങിയിരുന്നുള്ളൂവെന്നും അവർ വെളിപ്പെടുത്തി. ഓഗസ്റ്റിൽ നാട്ടിൽ വരാനിരിക്കെയായിരുന്നു മരണമെന്നും, ഈ ജോലി തന്റെ അവസാനമായിരിക്കുമെന്ന് അന്ന പറഞ്ഞിരുന്നതായും ആൻമേരി കൂട്ടിച്ചേർത്തു. ഒട്ടും സഹിക്കാൻ പറ്റാത്ത സാഹചര്യമായിരുന്നു അവിടെയെന്നും അവർ പറഞ്ഞു.

Story Highlights: EY company initiates internal investigation into leaked letter regarding Anna Sebastian’s death due to work pressure