കൊച്ചി ഇടപ്പള്ളിയിലെ മരോട്ടിച്ചോട് പാലത്തിന് സമീപം യുവാവിന്റെ മൃതദേഹം നടുറോഡില്‍ കണ്ടെത്തി. കൂനംതൈ സ്വദേശി പ്രവീണാണ് മരിച്ചതെന്ന് തിരിച്ചറിഞ്ഞു. തിരുവോണ ദിനത്തിൽ പുലർച്ചെയാണ് നാട്ടുകാർ മൃതദേഹം കണ്ടെത്തിയത്. കൊലപാതകമാണെന്ന് പൊലീസ് സംശയിക്കുന്നു.
പ്രവീണിന്റെ ശരീരത്തിൽ മുറിപ്പാടുകൾ കണ്ടെത്തിയിട്ടുണ്ട്. മർദ്ദനത്തെ തുടർന്നുണ്ടായ കൊലപാതകമാണെന്നാണ് പോലീസിന്റെ പ്രാഥമിക നിഗമനം. ഇയാൾ സ്ഥിരമായി മരോട്ടിച്ചോട് പാലത്തിന് താഴെയാണ് കിടന്ന് ഉറങ്ങിയിരുന്നതെന്ന് അറിയുന്നു. ഇന്നലെ രാത്രി സുഹൃത്തുക്കളുമൊത്ത് മദ്യപിക്കുന്നത് കണ്ടതായി പ്രദേശവാസികൾ മൊഴി നൽകിയിട്ടുണ്ട്. ഇവരെ കേന്ദ്രീകരിച്ചാണ് അന്വേഷണം നടക്കുന്നത്.
ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം കളമശേരി മെഡിക്കൽ കോളേജിലേക്ക് മാറ്റി. സിസിടിവി ദൃശ്യങ്ങൾ പരിശോധിച്ച് എളമക്കര പോലീസ് അന്വേഷണം ആരംഭിച്ചിട്ടുണ്ട്. സംഭവത്തിൽ കൂടുതൽ വിവരങ്ങൾ പുറത്തുവരാനിരിക്കുന്നതേയുള്ളൂ.
Story Highlights: Body of youth found on road in Kochi, suspected murder
