മലയാളത്തിന്റെ പ്രിയനടൻ മോഹൻലാലിന്റെ മകനാണ് പ്രണവ് മോഹൻലാൽ. മോഹൻലാലിൽ നിന്നും വ്യത്യസ്തമായി സോഷ്യൽ മീഡിയകളിലും ചാനൽ പരിപാടികളിലും അധികം സജീവമല്ലാത്തയാളാണ് പ്രണവ്.
യാത്രകളും പുസ്തകങ്ങളുമൊക്കെയാണ് അയാൾക്ക് പ്രിയമെന്ന് മകനെക്കുറിച്ച് മോഹൻലാൽ പറഞ്ഞിട്ടുണ്ട്. ഇപ്പോൾ ഹിമാചൽപ്രദേശിൽ മണാലിയിലെ നിരത്തുകളിൽ താര ജാഡ ഒട്ടുമില്ലാതെ യാത്ര നടത്തുകയാണ് പ്രണവ് മോഹൻലാൽ.
ഒരു കൂട്ടം മലയാളി യുവാക്കുകളാണ് പ്രണവിനെ തിരിച്ചറിഞ്ഞ് വീഡിയോ സമൂഹമാധ്യമങ്ങളിൽ പങ്കുവെച്ചത്. കുശലാന്വേഷണം നടത്തിയതിനുശേഷം വീഡിയോയ്ക്ക് നിൽക്കാതെ പ്രണവ് യാത്ര തുടർന്നു. ജ്യേഷ്ഠന്റെ അതേ പാതയിലാണ് അനുജത്തി വിസ്മയയും. യാത്രകളെ സ്നേഹിക്കുന്ന ഇരുവരും മിക്കവാറും യാത്രകളിലായിരിക്കും.
പുനർജനി എന്ന ചിത്രത്തിന് മികച്ച ബാലതാരത്തിനുള്ള അവാർഡ് ലഭിച്ചതിന് ശേഷം സിനിമയിൽ നിന്നും ഏറെക്കാലം പ്രണവ് വിട്ടുനിന്നു. പിന്നീട് സൗത്ത് വെയിൽസ് സർവകലാശാലയിൽ നിന്നും ബിരുദം സ്വീകരിച്ച ശേഷം തിരികെ എത്തുകയായിരുന്നു.
മേരിലാൻഡ് സിനിമാസിന്റെ ബാനറിൽ വിനീത് ശ്രീനിവാസൻ സംവിധാനം ചെയ്യുന്ന ഹൃദയമാണ് റിലീസാകാനിരിക്കുന്ന പുതിയ ചിത്രം. പ്രണവ് മോഹൻലാൽ നായകനായെത്തുന്ന ചിത്രത്തിൽ കല്യാണി പ്രിയദർശനും ദർശന രാജേന്ദ്രനുമാണ് നായികമാർ.
Story Highlights: Vloggers met Pranav Mohanlal at Manali.
