Venky Atluri praises Naslen at 'Lokah' success celebration

ഓണത്തിന് പുറത്തിറങ്ങിയ ഡൊമിനിക് അരുണിന്റെ സംവിധാനത്തിൽ ഒരുങ്ങിയ ‘ലോക’ ബോക്സ് ഓഫീസിൽ 100 കോടി ക്ലബ്ബിൽ ഇടം നേടി മുന്നേറുകയാണ്. ചിത്രത്തിന്റെ തെലുങ്ക് പതിപ്പിന്റെ വിജയാഘോഷത്തിനിടെ നടൻ നസ്ലിനെ പ്രശംസിച്ച് സംസാരിച്ച ലക്കി ഭാസ്കറിൻ്റെ സംവിധായകൻ വെങ്കി അറ്റ്ലൂരിയുടെ വാക്കുകൾ ശ്രദ്ധേയമാകുന്നു. കേരളത്തിൽ മാത്രമല്ല, ദക്ഷിണേന്ത്യയിൽ ഒട്ടാകെ ചിത്രം തരംഗമായിരിക്കുകയാണ്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

തെലുങ്ക് പ്രേക്ഷകർ നസ്ലിന്റെ കടുത്ത ആരാധകരാണെന്ന് വെങ്കി അറ്റ്ലൂരി അഭിപ്രായപ്പെട്ടു. സ്ക്രീനിൽ നസ്ലിനെ കണ്ടപ്പോൾ തന്നെ തിയേറ്ററുകളിൽ വലിയ ആഘോഷമായിരുന്നുവെന്നും അദ്ദേഹം കൂട്ടിച്ചേർത്തു. സിതാര എന്റർടെയ്ൻമെൻ്റ് പുറത്തുവിട്ട വീഡിയോയിലാണ് അദ്ദേഹത്തിന്റെ ഈ വാക്കുകൾ ഉൾക്കൊള്ളുന്നത്. ‘ലോക’യുടെ തെലുങ്ക് വിതരണക്കാർ സിതാര എന്റർടെയ്ൻമെൻ്റ് ആണ്.

മലയാളത്തിലെ അഭിനേതാക്കൾ മികച്ച പ്രകടനം കാഴ്ചവെക്കുന്നുണ്ടെന്ന് അറ്റ്ലൂരി പ്രശംസിച്ചു. ചന്തു സലിംകുമാറും അരുണും തങ്ങളെ ശരിക്കും ചിരിപ്പിച്ചെന്നും അദ്ദേഹം പറഞ്ഞു. “മലയാളത്തിലെ എല്ലാ അഭിനേതാക്കളും അടിപൊളി അഭിനേതാക്കളാണ്. ചന്തു സലിംകുമാറും അരുണും നമ്മളെ ശരിക്കും ചിരിപ്പിച്ചു. പിന്നെ നസ്ലിൻ – അദ്ദേഹം അഭിനയിക്കാൻ തുടങ്ങിയില്ല, മുഖം സ്ക്രീനിൽ കാണിച്ചതേയുള്ളൂ, അപ്പോഴേക്കും ആളുകൾ ആഘോഷിക്കാൻ തുടങ്ങി. പ്രേക്ഷകർക്ക് നിങ്ങളോട് അത്രയും ഭ്രാന്തമായ ആരാധനയുണ്ട്,” വെങ്കി അറ്റ്ലൂരി പറഞ്ഞു.

വെങ്കി അറ്റ്ലൂരിയുടെ പ്രശംസ നിറഞ്ഞ വാക്കുകൾ നിറഞ്ഞ കൈയ്യടികളോടെയാണ് കാണികൾ സ്വീകരിച്ചത്. വേദിയിൽ വെങ്കി തെലുങ്കിൽ സംസാരിച്ചത് നസ്ലിന് വേണ്ടി പരിഭാഷപ്പെടുത്തി നൽകിയത് ദുൽഖർ സൽമാൻ ആയിരുന്നു. ഈ അഭിനന്ദനം സന്തോഷത്തോടെയും അത്ഭുതത്തോടെയുമാണ് നസ്ലിൻ സ്വീകരിച്ചത്.

കഴിഞ്ഞ ഏഴ് ദിവസങ്ങൾ കൊണ്ട് 101 കോടി രൂപ കളക്ഷൻ നേടിയ ‘ലോക’യുടെ ഹിന്ദി പതിപ്പ് പുറത്തിറങ്ങാൻ ഒരുങ്ങുകയാണ്. ചിത്രത്തിൽ കല്യാണി പ്രിയദർശൻ ആണ് കേന്ദ്ര കഥാപാത്രത്തെ അവതരിപ്പിച്ചത്. കൂടാതെ ചിത്രം നിരൂപക പ്രശംസയും നേടിയിരുന്നു.

നസ്ലിന് പുറമെ ചന്തു സലിംകുമാർ, അരുൺ കുര്യൻ, നിഷാന്ത് സാഗർ, വിജയരാഘവൻ, ശരത് സഭ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. അതുപോലെ, പ്രേക്ഷകരെ ആവേശത്തിലാഴ്ത്തുന്ന നിരവധി അതിഥി വേഷങ്ങളും സിനിമയിലുണ്ട്. തെന്നിന്ത്യയിൽ ഒരു നായികാ പ്രാധാന്യമുള്ള സിനിമ ഇത്രയധികം കളക്ഷൻ നേടുന്നത് ഇതാദ്യമാണ്.

Story Highlights: ഡൊമിനിക് അരുണിന്റെ ‘ലോക’ സിനിമയുടെ തെലുങ്ക് പതിപ്പിന്റെ വിജയാഘോഷത്തിനിടെ നടൻ നസ്ലിനെ പ്രശംസിച്ച് ലക്കി ഭാസ്കറിൻ്റെ സംവിധായകൻ വെങ്കി അറ്റ്ലൂരി.

കമലഹാസന് ശേഷം ആ നിഷ്കളങ്കത നസ്ലെനില്; പ്രശംസയുമായി പ്രിയദര്ശന്