കോൺഗ്രസ് നേതാവ് രാഹുൽ ഗാന്ധി ഇന്ന് വയനാട് സന്ദർശിക്കും. മൂന്നുദിവസത്തെ സന്ദർശനത്തിനായാണ് രാഹുൽ ഗാന്ധി എംപി കേരളത്തിലെത്തുന്നത്. രാവിലെ കരിപ്പൂർ വിമാനത്താവളത്തിൽ എത്തുന്ന രാഹുൽ ഗാന്ധിയെ പ്രതിപക്ഷനേതാവും കെപിസിസി പ്രസിഡന്റും ചേർന്ന് സ്വീകരിക്കും.
വയനാട് ജില്ലയിലെ വിവിധ പൊതുപരിപാടികളിലായിരിക്കും സന്ദർശനത്തിന്റെ ആദ്യദിനത്തിൽ പങ്കെടുക്കുക. ശേഷം ആദിവാസി കോളനികളിലെ കുടിവെള്ള പദ്ധതി ഉദ്ഘാടനം ചെയ്യും. മാനന്തവാടിയിൽ പുതുതായി നിർമ്മിച്ച ഗാന്ധി പ്രതിമയുടെ അനാച്ഛാദനവും നിർവഹിക്കും.
എൽഎൽബി ദേശീയ പ്രവേശന പരീക്ഷയിൽ മികച്ച വിജയം കരസ്ഥമാക്കിയ ആദിവാസി വിദ്യാർത്ഥികളോടൊപ്പം ഉച്ച ഭക്ഷണം കഴിക്കും. വയനാട് ജില്ലാ കളക്ടറുമായി നാളെ കൂടിക്കാഴ്ച നടത്തും. ജനപ്രതിനിധികളും ജില്ലാ കളക്ടറുമായി നാളെ നടക്കുന്ന അവലോകന യോഗത്തിനു ശേഷം മലപ്പുറത്തേക്ക് തിരിക്കും.
തുടർന്ന് മലപ്പുറം വണ്ടൂരിൽ ഗാന്ധിഭവൻ വൃദ്ധസദനത്തിലെ അന്തേവാസികളുമായി ഉച്ച ഭക്ഷണം കഴിക്കും. മറ്റു പൊതുപരിപാടികളിലും പങ്കെടുത്തതിന് ശേഷം ബുധനാഴ്ച ഡൽഹിയിലേക്ക് തിരിക്കും.
Story Highlights: Rahul Gandhi to visit wayanad today.
