പത്തനംതിട്ട കോന്നിയിൽ യുവാവിന് ക്രൂരമർദ്ദനം നേരിട്ട സംഭവത്തിൽ നാലു പേരെ പൊലീസ് പിടികൂടി. കോന്നി കുളത്തുമൺ സ്വദേശി സനോജിനാണ് മർദ്ദനമേറ്റത്. കഴിഞ്ഞ വ്യാഴാഴ്ച രാത്രി കോന്നി ടൗണിന് സമീപമുള്ള സൂര്യ ബാറിന് മുന്നിലായിരുന്നു സംഘർഷം. സിമന്റ് കട്ടകൊണ്ടും ഹെൽമറ്റ് കൊണ്ടുമായിരുന്നു മർദ്ദനം നടത്തിയത്.
കോന്നി സ്വദേശികളായ അജീഷ്, രതീഷ്, മധു, ബിനു എന്നിവരടങ്ങുന്ന സംഘമാണ് യുവാവിനെ മർദ്ദിച്ചതെന്ന് പൊലീസ് വ്യക്തമാക്കി. വ്യാഴാഴ്ച ഉച്ചയ്ക്ക് പ്രതികൾ സനോജുമായി വാക്കുതർക്കമുണ്ടായിരുന്നു. തുടർന്ന് രാത്രിയിൽ മദ്യപിച്ച ശേഷം സംഘം ചേർന്ന് ഇയാളെ ആക്രമിക്കുകയായിരുന്നു. സംഭവത്തിൽ അജീഷ്, രതീഷ്, മധു, ബിനു എന്നിവരെ പൊലീസ് അറസ്റ്റ് ചെയ്തു.
സനോജിനെ ക്രൂരമായി മർദ്ദിച്ച ബിനുവിനെ റിമാൻഡ് ചെയ്തിട്ടുണ്ട്. ഇവർക്ക് പുറമെ കണ്ടാലറിയാവുന്ന രണ്ടുപേർക്കെതിരെയും കേസെടുത്തിട്ടുണ്ടെന്ന് പൊലീസ് അറിയിച്ചു. തലയ്ക്ക് ഗുരുതരമായ പരുക്കേറ്റ സനോജ് കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലാണ്.
Story Highlights: Youth brutally assaulted in Konni, Pathanamthitta; four arrested
