പുനലൂർ : കടിച്ച പാമ്പിനെ പിടികൂടി വനപാലകർക്ക് കൈമാറിയ യുവാവ് മണിക്കൂറുകൾക്കകം ആശുപത്രിയിൽ വച്ച് മരണപ്പെട്ടു.തെന്മല ഇടമൺ സ്വദേശി ബിനു (41) ആണ് പാമ്പ് കടിച്ചു മരിച്ചത്. വെള്ളിയാഴ്ച രാത്രി എട്ടരയോടെയാണ് ബിനുവിന് പാമ്പു കടിയേറ്റത്.
കരവാളൂർ മാത്രയിലെ കലുങ്കുംമുക്ക് ഏലായിലായിരുന്നു സംഭവം.ബന്ധുവീട്ടിലേക്ക് വരുംവഴി പുഴയിൽ കാൽ കഴുകാൻ ഇറങ്ങുമ്പോഴായിരുന്നു ബിനുവിനു പാമ്പ് കടിയേറ്റത്.മൊബൈൽ ഫോണിന്റെ വെളിച്ചത്തിൽ പാമ്പിനെ കണ്ടെത്തി പിടികൂടിയ ബിനു പാമ്പുമായി റോഡിലെത്തി നാട്ടുകാരെയും വനപാലകരെയും വിവരമറിയിക്കുകയും തുടർന്ന് വനപാലകർക്ക് പാമ്പിനെ കൈമാറുകയുമായിരുന്നു.
പിന്നീട് ശാരീരിക അസ്വസ്ഥത അനുഭവപ്പെട്ടതിനെ തുടർന്ന് ബിനുവിനെ തിരുവനന്തപുരത്തെ സ്വകാര്യ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചുവെങ്കിലും രാത്രി പത്തു മണിയോടെ മരണപ്പെടുകയായിരുന്നു.മൃതദേഹം പോസ്റ്റുമാർട്ടം നടത്തിയ ശേഷം ബന്ധുക്കൾക്ക് വിട്ടുനൽകും.
Stoty highlight : Young man died after bitten by a snake at punalur.
