പുണെയിലെ ഹദാപ്‌സറിലെ ഹുന്ദേകര്‍ വസ്തിയില്‍ താമസിച്ചിരുന്ന സ്വപ്നാലി ഉമേഷ് പവാര്‍ (24) എന്ന യുവതിയുടെ മരണം നാടിനെ ഞെട്ടിച്ചിരിക്കുകയാണ്. ക്യാബ് ഡ്രൈവറായ ഭര്‍ത്താവ് ഉമേഷ് രണ്ട് ദിവസം ഭാര്യയെ തേടി അലഞ്ഞതിന് ശേഷമാണ് സോഫയ്ക്കുള്ളില്‍ ഒടിച്ചുമടക്കിയ നിലയില്‍ മൃതദേഹം കണ്ടെത്തിയത്.
ഉമേഷ് ബീഡിലേക്ക് യാത്രക്കാരനെ കൊണ്ടുപോയ ശേഷം, ഏഴാം തീയതി രാവിലെ പത്തിന് സ്വപ്നാലിയുമായി സംസാരിച്ചിരുന്നു. എന്നാല്‍ പിന്നീട് ബന്ധപ്പെടാന്‍ കഴിയാതെ വന്നപ്പോള്‍ സുഹൃത്തിനോട് അന്വേഷിക്കാന്‍ ആവശ്യപ്പെട്ടു. എട്ടാം തീയതി തിരിച്ചെത്തിയ ഉമേഷ് ബൈക്കില്‍ തെരുവുകളിലും ബന്ധുക്കളുടെ വീടുകളിലും അന്വേഷിച്ചെങ്കിലും ഫലമുണ്ടായില്ല.
ശനിയാഴ്ച രാവിലെ സ്വപ്നാലിയുടെ വിലപിടിപ്പുള്ള വസ്തുക്കള്‍ കാണാതായത് ശ്രദ്ധയില്‍പ്പെട്ടതോടെയാണ് സോഫ-കം-ബെഡിന്റെ കംപാര്‍ട്‌മെന്റുകള്‍ പരിശോധിച്ചത്. അവിടെ നിന്നാണ് മൃതദേഹം കണ്ടെത്തിയത്. പോസ്റ്റ്മോര്‍ട്ടത്തില്‍ കഴുത്തുഞെരിച്ചാണ് കൊലപ്പെടുത്തിയതെന്ന് കണ്ടെത്തി. സംഭവത്തില്‍ സംശയമുള്ള ഒരാളെ പൊലീസ് നിരീക്ഷിക്കുന്നുണ്ട്. ഫുര്‍സുംഗി പൊലീസാണ് കേസ് അന്വേഷിക്കുന്നത്.
Story Highlights: Wife’s body found inside sofa after husband’s two-day search in Pune
