ഇന്ത്യയിലെ ആദ്യ നോബൽ സമ്മാന ജേതാവായ രവീന്ദ്രനാഥ ടാഗോറിന്റെ നിറം ഇരുണ്ടതാണെന്ന കേന്ദ്രമന്ത്രി സുഭാസ് സർക്കാരിന്റെ വാക്കുകൾ വിവാദമാകുന്നു. ടാഗോറിന്റേത് ഇരുണ്ട നിറമായതുകൊണ്ട് അമ്മ മറ്റുമക്കളിൽ നിന്നും വ്യത്യസ്തമായാണ് അദ്ദേഹത്തോട് പെരുമാറിയിരുന്നത് എന്നാണ് സുഭാസ് സർക്കാർ പറഞ്ഞത്.
ടാഗോറിന്റെ കുടുംബത്തിലെ മറ്റ് അംഗങ്ങളിൽ നിന്നും വ്യത്യസ്തമായി ടാഗോർ ഇരുണ്ട നിറത്തിനുടമയായിരുന്നുവെന്നും അമ്മയും മറ്റു ചില കുടുംബാംഗങ്ങളും ടാഗോറിനെ എടുക്കാൻ പോലും മടിച്ചിരുന്നുവെന്നും പ്രസംഗത്തിനിടെ മന്ത്രി പറഞ്ഞത് വലിയ വിവാദമായിരിക്കുകയാണ്.
ശാന്തിനികേതനിൽ ടാഗോർ പണികഴിപ്പിച്ച വിശ്വഭാരതി യൂണിവേഴ്സിറ്റി സന്ദർശിച്ചപ്പോഴായിരുന്നു അദ്ദേഹം വിവാദ പ്രസംഗം നടത്താനിടയായത്. തുടർന്ന് പ്രതിപക്ഷ പാർട്ടികളും സാംസ്കാരിക പ്രവർത്തകരും മന്ത്രിക്കെതിരെ രംഗത്തെത്തി.
ബംഗാളിന്റെ പ്രതീകമായ ടാഗോറിനെ അപമാനിച്ചുവെന്ന് ത്രിണമൂൽ കോൺഗ്രസ് ആരോപിച്ചു. ഒരിക്കൽക്കൂടി വിശ്വഭാരതി യൂണിവേഴ്സിറ്റിയിൽ സുഭാസ് സർക്കാറിനെ പ്രവേശിക്കാൻ അനുവദിക്കില്ലെന്ന് ടിഎംസി നേതാവായ അഭിഷേക് ബാനർജി പറഞ്ഞു.
Story highlight : Union Minister racist words about Tagore.
