മലപ്പുറം തിരൂരിലെ ഡെപ്യൂട്ടി തഹസില്‍ദാര്‍ ചാലിബ് പി.ബി (49) കാണാതായതായി പരാതി ഉയര്‍ന്നിരിക്കുകയാണ്. തിരൂര്‍ മാങ്ങാട്ടിരി പൂകൈ സ്വദേശിയായ ഇദ്ദേഹത്തെ ഇന്നലെ വൈകിട്ട് മുതലാണ് കാണാതായത്. തിരൂര്‍ പൊലീസ് അന്വേഷണം ആരംഭിച്ചിട്ടുണ്ട്.
ഇന്നലെ വൈകുന്നേരം 5.15ഓടെ ഓഫീസില്‍ നിന്നിറങ്ങിയ ചാലിബ് വീട്ടില്‍ ബന്ധപ്പെട്ടിരുന്നു. വളാഞ്ചേരിയില്‍ ഒരു പരിശോധന നടത്താന്‍ പോകുന്നതായും വൈകുമെന്നും ഭാര്യയെ അറിയിച്ചിരുന്നു. എന്നാല്‍ രാത്രി എട്ട് മണിയായിട്ടും തിരിച്ചെത്താത്തതിനെ തുടര്‍ന്ന് കുടുംബം അന്വേഷണം നടത്തി. 12 മണിയോടെ പൊലീസിനെ സമീപിക്കുകയും ചെയ്തു.
കോഴിക്കോട് പാളയം ഭാഗത്താണ് ചാലിബിന്റെ ഏറ്റവും ഒടുവിലത്തെ ടവര്‍ ലൊക്കേഷന്‍ കാണിച്ചത്. ഇന്ന് രാവിലെ മൊബൈല്‍ ഫോണ്‍ സ്വിച്ച് ഓഫായി. മണ്ണ് മാഫിയയുമായി ബന്ധപ്പെട്ട ഇടപെടല്‍ തിരോധാനത്തിന് പിന്നില്‍ ഉണ്ടെന്ന് കുടുംബം ആരോപിച്ചിട്ടുണ്ട്. ഈ സാഹചര്യത്തില്‍ പൊലീസ് വിശദമായ അന്വേഷണം നടത്തി വരികയാണ്.
Story Highlights: Deputy Tehsildar from Tirur, Malappuram goes missing, family suspects involvement of sand mafia
