കോഴിക്കോട് തൂണേരി ഷിബിൻ കൊലക്കേസിലെ പ്രതികളെ നെടുമ്പാശേരി വിമാനത്താവളത്തിൽ വെച്ച് പിടികൂടി അറസ്റ്റ് രേഖപ്പെടുത്തി. വിദേശത്തായിരുന്ന പ്രതികളെ വൈകീട്ടോടെയാണ് പിടികൂടിയത്. പ്രതികളെ വൈദ്യ പരിശോധനക്കായി കോഴിക്കോട് ബീച്ച് ആശുപത്രിയിൽ എത്തിച്ചു. നാളെ ഇവരെ ഹൈക്കോടതിയിൽ ഹാജരാക്കും.
കഴിഞ്ഞയാഴ്ച ഹൈക്കോടതി വിചാരണക്കോടതി വെറുതെവിട്ട എട്ടുപ്രതികൾ കുറ്റക്കാരെന്ന് വിധിച്ചിരുന്നു. കേസിലെ ഒന്നു മുതൽ ആറുവരെ പ്രതികളും 15, 16 പ്രതികളുമാണ് കുറ്റക്കാരാണെന്ന് കണ്ടെത്തിയത്. ഇവർക്കുള്ള ശിക്ഷയിന്മേൽ വാദം നടത്തിയതിനു ശേഷം ഒരു പക്ഷേ നാളെ ഹൈക്കോടതി വിധി പറഞ്ഞേക്കും.
2015 ജനുവരി 22നാണ് ഡിവൈഎഫ്‌ഐ പ്രവർത്തകനായിരുന്ന ഷിബിനെ ലീഗ് പ്രവർത്തകർ കൊലപ്പെടുത്തിയത്. രാഷ്ട്രീയവും വർഗീയവുമായ വിരോധത്താൽ ലീഗ് പ്രവർത്തകരായ പ്രതികൾ മാരകായുധങ്ങളുമായി ഷിബിൻ ഉൾപ്പെടെയുള്ള സി.പി.എം പ്രവർത്തകരെ ആക്രമിച്ചെന്നും ഷിബിനെ കൊലപ്പെടുത്തിയെന്നുമാണ് കേസ്. നേരത്തെ കുറ്റം തെളിയിക്കുന്നതിൽ പ്രോസിക്യൂഷൻ പരാജയപ്പെട്ടതായി കണ്ടെത്തിയായിരുന്നു 18 പ്രതികളിൽ 17 പേരെ അഡീഷണൽ സെഷൻസ് ജഡ്ജി എസ്. കൃഷ്ണകുമാർ വെറുതെ വിട്ടത്.
Story Highlights: Accused in Thuneri Shibin murder case arrested at Nedumbassery airport
