തമിഴ്‌നാട്ടിലെ ബിഎസ്പി നേതാവ് ആംസ്‌ട്രോങിന്റെ കൊലപാതകക്കേസിലെ പ്രധാന പ്രതിയായ ഗുണ്ടാനേതാവ് തിരുവെങ്കിടത്തിനെ തമിഴ്‌നാട് പൊലീസ് ഏറ്റുമുട്ടലില്‍ വധിച്ചു. ചെന്നൈ മാധാവരത്ത് വച്ചാണ് പൊലീസ് തിരുവെങ്കിടത്തിന് നേരെ വെടിയുതിര്‍ത്തത്. പ്രതി രക്ഷപ്പെടാന്‍ ശ്രമിച്ചപ്പോള്‍ വെടിവയ്‌ക്കേണ്ടി വന്നുവെന്നാണ് പൊലീസ് പറയുന്നത്.
കഴിഞ്ഞ ദിവസം തിരുവെങ്കിടം ഉള്‍പ്പെടെയുള്ള 4 പ്രതികളെ പൊലീസ് കസ്റ്റഡിയില്‍ എടുത്തിരുന്നു. ആംസ്‌ട്രോങിനെ കൊലപ്പെടുത്താന്‍ ഉപയോഗിച്ച ആയുധങ്ങള്‍ കണ്ടെത്തുന്നതിനായി ഇന്ന് തെളിവെടുപ്പ് പുരോഗമിക്കുകയായിരുന്നു. ചെന്നൈ കോര്‍പ്പറേഷനിലെ മുന്‍ കൗണ്‍സിലറായ ആംസ്‌ട്രോങ്ങിനെ പെരമ്പൂരിലെ വീടിന് സമീപം വെച്ചാണ് അക്രമിസംഘം കൊലപ്പെടുത്തിയത്.
തമിഴ്‌നാട് ബിഎസ്പി അധ്യക്ഷനായ ആംസ്‌ട്രോങിനെ പ്രതികള്‍ കുറച്ച് ദിവസം മുന്‍പാണ് വെട്ടിക്കൊലപ്പെടുത്തിയത്. ഇത് തമിഴ്‌നാട് പൊലീസിനുനേരെ നിരവധി വിമര്‍ശനങ്ങളുയരാന്‍ കാരണമായിരുന്നു. വെട്ടേറ്റ് ചോരവാര്‍ന്ന അവസ്ഥയിലായ അദ്ദേഹത്തെ ആശുപത്രിയിലേക്ക് കൊണ്ടുപോകും വഴി മരണം സംഭവിക്കുകയായിരുന്നു.
