കുഞ്ചാക്കോ ബോബനെ നായകനാക്കി മാർട്ടിൻ പ്രക്കാട്ട് സംവിധാനം ചെയ്ത ‘നായാട്ട്’ എന്ന ചിത്രം ഏറെ പ്രേക്ഷകശ്രദ്ധ നേടിയിരുന്നു.
തിയേറ്ററുകളിലടക്കം മികച്ച പ്രതികരണമാണ് ചിത്രത്തിന് ലഭിച്ചത്.
മലയാളക്കരയെ മാത്രമല്ല തമിഴകത്തെയും പ്രകമ്പനം കൊള്ളിക്കാൻ ‘നായാട്ട്’ എത്തുകയാണ്. സംവിധാന മികവിലൂടെ ദേശീയ ശ്രദ്ധ നേടിയ അനുഗ്രഹീത സംവിധായകൻ ഗൗതം വാസുദേവ് മേനോനാണ് തമിഴിൽ ചിത്രത്തിന്റെ സംവിധാനം നിർവഹിക്കുന്നത്.
കുഞ്ചാക്കോ ബോബനെ കൂടാതെ ജോജു ജോർജും പ്രധാന വേഷത്തിൽ ‘നായാട്ടിൽ’ എത്തിയിരുന്നു. അഭിനയ മികവിനാലും കരുത്തുറ്റ സ്ത്രീകഥാപാത്രങ്ങളാലും പ്രേക്ഷക ഹൃദയത്തിൽ ഇടം നേടിയ നിമിഷ സജയനായിരുന്നു ചിത്രത്തിലെ നായിക.
പ്രമുഖ ഒടിടി പ്ലാറ്റ്ഫോമായ നെറ്റ്ഫ്ലിക്സിലുൾപ്പെടെ പ്രദർശിപ്പിച്ച ചിത്രം ന്യൂയോർക്ക് ടൈംസിന്റെ മികച്ച 5 അന്താരാഷ്ട്ര ചിത്രങ്ങളിൽ ഇടംനേടിയിരുന്നു. മാർട്ടിൻ പ്രക്കാട്ട് ആറുവർഷത്തിനു ശേഷം സംവിധാനം ചെയ്ത ചിത്രം കൂടിയായിരുന്നു ‘നായാട്ട്’. ചിത്രത്തിന്റെ ഛായാഗ്രഹണം നിർവഹിച്ചിരുന്നത് ഷൈജു ഖാലിദാണ്.
Story Highlights: Film Nayatt to be remaked in tamil, hindi&Telugu
