പാലക്കാട് ജില്ലയിലെ കൂറ്റനാട് പ്രദേശത്ത് പ്ലസ് ടു വിദ്യാർത്ഥികൾ തമ്മിലുണ്ടായ സംഘർഷത്തിൽ ഒരു വിദ്യാർത്ഥിക്ക് കുത്തേറ്റു. കുമരനല്ലൂർ ഗവ ഹയർ സെക്കന്ററി സ്കൂളിലെയും മേഴത്തൂർ ഗവ ഹയർ സെക്കന്ററി സ്കൂളിലെയും വിദ്യാർത്ഥികൾ തമ്മിലാണ് സംഘർഷമുണ്ടായത്. തൃത്താലയിൽ നടന്നുവരുന്ന സബ് ജില്ലാ കലോത്സവത്തിനിടെയാണ് ഇരു സ്കൂളുകളിലെയും വിദ്യാർത്ഥികൾ തമ്മിൽ ആദ്യം സംഘർഷമുണ്ടായത്.
പിന്നീട് പരസ്പരം പക വീട്ടുമെന്ന് പറഞ്ഞുള്ള ഇൻസ്റ്റഗ്രാം റീലുകൾ ഇരുവിഭാഗവും പങ്കുവച്ചു. എന്നാൽ രക്ഷിതാക്കളുടെയും അധ്യാപകരുടെയും ഇടപെടലിനെ തുടർന്ന് റീലുകൾ പിൻവലിക്കപ്പെട്ടു. ഒത്തുതീർപ്പിനെന്ന പേരിൽ ഇന്ന് വൈകീട്ട് കൂട്ടനാട് മല റോഡിൽ ഇരു വിഭാഗവും എത്തിയപ്പോഴാണ് സംഘർഷം രൂക്ഷമായത്.
അവിടെ വെച്ചുള്ള തർക്കത്തിൽ മേഴത്തൂർ സ്കൂളിലെ പ്ലസ് ടു വിദ്യാർത്ഥി അബ്ദുൾ ബാസിത്തിന് വയറിൽ കുത്തേറ്റു. പരിക്കേറ്റ ബാസിത്തിനെ കുന്നംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തിൽ കുമരനെല്ലൂർ ഹയർ സെക്കന്ററി സ്കൂളിലെ മൂന്ന് പ്ലസ് ടു വിദ്യാർത്ഥികളെ ചാലിശ്ശേരി പൊലീസ് കസ്റ്റഡിയിലെടുത്തു.
Story Highlights: Clash between Plus Two students in Palakkad leads to stabbing incident
