ഉത്തരാഖണ്ഡിലെ നൈനിറ്റാളില്‍ നിന്നുള്ള ഒരു നഴ്സിനെ ബലാത്സംഗം ചെയ്ത് കൊലപ്പെടുത്തിയ സംഭവത്തില്‍ പ്രതി പിടിയിലായി. ഉദ്ധം സിംഗ് നഗറില്‍ നിന്നുള്ള ധര്‍മ്മേന്ദ്രകുമാര്‍ എന്നയാളാണ് അറസ്റ്റിലായത്. ജൂലൈ 30ന് കാണാതായ 33 വയസ്സുള്ള യുവതിയുടെ മൃതദേഹം രണ്ട് ദിവസം മുന്‍പ് ഉത്തര്‍പ്രദേശിലെ ദിബ്ദിബ പ്രദേശത്താണ് കണ്ടെത്തിയത്.
സ്വകാര്യ ആശുപത്രിയില്‍ ജോലി ചെയ്തിരുന്ന നഴ്സ് ജോലി കഴിഞ്ഞ് വീട്ടിലേക്ക് മടങ്ങുന്ന വഴിയാണ് കൊലപാതകത്തിന് ഇരയായത്. യുവതി വീട്ടില്‍ എത്താതിരുന്നതിനെ തുടര്‍ന്ന് സഹോദരി രുദ്രാപുര്‍ പോലീസ് സ്റ്റേഷനില്‍ പരാതി നല്‍കിയിരുന്നു. യുവതിയുടെ കാണാതായ ഫോണ്‍ കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയിലേക്ക് പോലീസ് എത്തിച്ചേര്‍ന്നത്.
ഉത്തര്‍പ്രദേശിലെ ബറേലിയില്‍ ദിവസവേതനത്തിന് ജോലി ചെയ്തിരുന്ന ധര്‍മേന്ദ്രയെ രാജസ്ഥാനില്‍ നിന്നാണ് പിടികൂടിയത്. പ്രതി യുവതിയെ ക്രൂരമായി ബലാത്സംഗം ചെയ്ത ശേഷം സ്‌കാര്‍ഫ് ഉപയോഗിച്ച് ശ്വാസം മുട്ടിച്ച് കൊലപ്പെടുത്തുകയായിരുന്നുവെന്ന് പോലീസ് വെളിപ്പെടുത്തി. ബംഗാളില്‍ സമാനമായ സംഭവത്തില്‍ മമതാ ബാനര്‍ജിയെ കുറ്റപ്പെടുത്തിയ ബിജെപിക്ക് തിരിച്ചടിയായി ഉത്തരാഖണ്ഡിലെ ഈ സംഭവം മാറിയിരിക്കുകയാണ്.
Story Highlights: Nurse raped and murdered in Uttarakhand, suspect arrested in Rajasthan
