സഖാവ് ടി പി ചന്ദ്രശേഖരന്റെ മകനെയും ആർഎംപി സംസ്ഥാന സെക്രട്ടറി കെ. വേണുവിനെയും വധിക്കുമെന്ന് കാണിച്ച് വധ ഭീഷണിക്കത്ത് വന്നിരുന്നു. ഇതിനെ തുടർന്നായിരുന്നു സഖാവ് ടി.പി ചന്ദ്രശേഖരന്റെ ഭാര്യയും എംഎൽഎയുമായ കെ.കെ രമയുടെ പ്രതികരണമുണ്ടായത്.
`സിപിഎം ഓലപ്പാമ്പു കാട്ടി പേടിപ്പിക്കാൻ നോക്കണ്ട. ഇതുകൊണ്ടൊന്നും ഞങ്ങൾ പേടിക്കുകയോ തളരുകയോ ചെയ്യില്ല. ചന്ദ്രശേഖരനെ വധിച്ച സിപിഎം എന്ന പാർട്ടിയുടെ തെറ്റായ നയങ്ങളെയും ക്രിമിനൽ പ്രവർത്തനങ്ങളെയും ഇനിയും പൊതുസമൂഹത്തിനു മുന്നിൽ തുറന്നു കാണിക്കും. വെറും ഭീഷണിക്കത്ത് കൊണ്ട് മാത്രം പേടിപ്പിച്ചിരുത്താമെന്നത് വ്യാമോഹം മാത്രമാണ്’ ഭീഷണിക്കത്തിനെത്തുടർന്ന് എംഎൽഎ കെ.കെ രമ പ്രതികരിച്ചതിങ്ങനെയായിരുന്നു.
സംഭവത്തിൽ വടകര പോലീസ് കേസെടുക്കുകയും കെ.കെ രമയുടെയും ആർഎംപി നേതാവ് വേണുവിന്റെയും വീടുകളിൽ സുരക്ഷ ശക്തമാക്കുകയും ചെയ്തു.
കോഴിക്കോട് നിന്ന് പോസ്റ്റ് ചെയ്ത വധഭീഷണി കത്തിൽ റെഡ് ആർമി കണ്ണൂർ ആൻഡ് പി ജെ ബോയ്സ് എന്നാണ് പേര് നൽകിയിരിക്കുന്നത്.
Story Highlights: Not afraid of death threat says MLA K.K Rema
