പാലക്കാട് കുഴൽമന്ദം നടുത്തറ വീട്ടിൽ കെ.മനോജ് (39) എന്ന കെ.എസ്.ആർ.ടി.സി കണ്ടക്ടർ തൃശൂരിലെ സ്വകാര്യ മെഡിക്കൽ കോളജിൽ മരണമടഞ്ഞു. പലിശ സംഘത്തിന്റെ മർദനമേറ്റ് ചികിത്സയിലായിരുന്ന മനോജിന്റെ മരണത്തിന് കാരണമായേക്കാവുന്ന നിരവധി പരുക്കുകൾ ശരീരത്തിലുണ്ടായിരുന്നതായി പരിചരിച്ച ഡോക്ടർമാർ പൊലീസിനെ അറിയിച്ചു.
ഈമാസം ഒൻപതിന് കുളവൻമുക്കിലെ സാമ്പത്തിക ഇടപാടുകാർ മനോജിന് നൽകിയ പണം തിരിച്ച് കിട്ടാൻ വൈകുന്നതിനെച്ചൊല്ലി തർ‌ക്കമുണ്ടാവുകയും മർദിക്കുകയും ചെയ്തതായി ബന്ധുക്കൾ പൊലീസിന് മൊഴി നൽകി. ആക്രമണം നടന്ന ദിവസം വൈകിട്ട് അവശനിലയിൽ സഹോദരി താമസിക്കുന്ന കൊടുവായൂരിലെ വാടക വീട്ടിലേക്ക് മനോജ് എത്തിയിരുന്നു. പിന്നീട് ആരോഗ്യസ്ഥിതി മോശമായതിനെ തുടർന്ന് തൃശൂരിലെ സ്വകാര്യ മെഡിക്കൽ കോളജിൽ പ്രവേശിപ്പിക്കുകയായിരുന്നു.
പണം വാങ്ങിയിട്ടുള്ള സംഘത്തിന്റെ വിവരങ്ങൾ ബന്ധുക്കൾ പൊലീസിന് കൈമാറിയിട്ടുണ്ട്. ബന്ധുക്കളുടെ പരാതിയുടെ അടിസ്ഥാനത്തിൽ പുതുനഗരം, കുഴൽമന്ദം സ്റ്റേഷനിലെ ഉദ്യോഗസ്ഥർ ആക്രമിച്ചവരെക്കുറിച്ചും കാരണം സംബന്ധിച്ചും അന്വേഷണം ആരംഭിച്ചിട്ടുണ്ട്.
Story Highlights: KSRTC conductor dies after being assaulted by money lenders in Palakkad
