കൊൽക്കത്ത ആർ ജി കർ മെഡിക്കൽ കോളേജിലെ ബലാത്സംഗ കൊലപാതക കേസിലെ മുഖ്യപ്രതി സഞ്ജയ് റോയ് തന്നെ കുറച്ചുനേരം ഉറങ്ങാൻ അനുവദിക്കണമെന്ന് ആവശ്യപ്പെട്ടു. കഴിഞ്ഞ രണ്ടാഴ്ചയായി നിരന്തരം ചോദ്യം ചെയ്യലിന് വിധേയനാകുന്നതിനാൽ ഉറങ്ങാൻ സാധിക്കുന്നില്ലെന്നാണ് അദ്ദേഹത്തിന്റെ പരാതി. ഇപ്പോൾ ജുഡീഷ്യൽ കസ്റ്റഡിയിലുള്ള സഞ്ജയ് റോയിയെ പ്രസിഡൻസി കറക്ഷൻ ഹോമിലെ വിഐപി വാർഡിലാണ് പാർപ്പിച്ചിരിക്കുന്നത്.
ജയിലിലെ ഭക്ഷണം പിടിക്കുന്നില്ലെന്നും റൊട്ടിക്കും പച്ചക്കറിക്കും പകരം മുട്ട നൽകണമെന്നും സഞ്ജയ് റോയ് ആവശ്യപ്പെട്ടതായി ഉദ്യോഗസ്ഥർ അറിയിച്ചു. കൊൽക്കത്ത പൊലീസും സിബിഐയും ആഴ്ചകളായി രാത്രി ഉൾപ്പെടെ തന്നെ ചോദ്യം ചെയ്യുന്നതിനാൽ ഉറങ്ങാൻ കഴിയുന്നില്ലെന്ന് അദ്ദേഹം പരാതിപ്പെട്ടു. അതീവ സുരക്ഷയുള്ള സെല്ലിലാണ് അദ്ദേഹത്തെ പാർപ്പിച്ചിരിക്കുന്നത്.
അതേസമയം, സഞ്ജയ് റോയുടെ അടുത്ത സുഹൃത്ത് എ എസ് ഐ അനുപ് ദത്തയെ സിബിഐ നുണപരിശോധനയ്ക്ക് വിധേയനാക്കുമെന്നാണ് റിപ്പോർട്ട്. കുറ്റകൃത്യത്തെക്കുറിച്ച് ഇയാൾക്ക് നേരത്തെ അറിവുണ്ടായിരുന്നോ എന്നതാണ് സിബിഐയുടെ അന്വേഷണ വിഷയം. കേസിൽ കൂടുതൽ പേർ ഉൾപ്പെട്ടിട്ടുണ്ടെന്ന് സിബിഐ നേരത്തെ കണ്ടെത്തിയിരുന്നു. ഇതിന്റെ അടിസ്ഥാനത്തിൽ ആശുപത്രിയിലെ അഞ്ച് ഡോക്ടർമാരെ അടക്കം ചോദ്യം ചെയ്തിരുന്നു.
Story Highlights: Kolkata rape-murder case: Main accused Sanjay Roy pleads for sleep after continuous interrogation
