കാസർകോഡ് മഞ്ചേശ്വരത്ത് കവർച്ചാ സംഘത്തിലെ രണ്ട് പേരെ പൊലീസ് സാഹസികമായി പിടികൂടി. മഞ്ചേശ്വരം മജീർപള്ളയിൽ നടന്ന സംഭവത്തിൽ ഉള്ളാൾ സ്വദേശി ഫൈസൽ, സയ്യദ് അമാൻ എന്നിവരെയാണ് പൊലീസ് അറസ്റ്റ് ചെയ്തത്. സംഘത്തിലെ മറ്റ് നാലു പേർ ഓടി രക്ഷപ്പെട്ടു.
ഞായറാഴ്ച്ച പുലർച്ചെ മജീർപ്പള്ളയിൽ പട്രോളിംഗ് നടത്തുന്നതിനിടയിൽ സംശയകരമായി തോന്നിയ കാർ പൊലീസ് തടഞ്ഞുനിർത്തി പരിശോധിക്കുകയായിരുന്നു. പരിശോധനക്കിടയിലാണ് ഇവർ കവർച്ചാ സംഘമാണെന്ന് പൊലീസിന് മനസ്സിലായത്. കാറിനുള്ളിൽ ആറു പേരാണ് ഉണ്ടായിരുന്നത്. ബലപ്രയോഗത്തിലൂടെയാണ് രണ്ട് പേരെ പൊലീസ് കീഴടക്കിയത്. കവർച്ചാ സംഘം എത്തിയ കാറിൽ നിന്നും ഗ്യാസ് കട്ടർ, മാരകായുധങ്ങൾ മുതലായ സാധനങ്ങൾ പിടിച്ചെടുത്തിട്ടുണ്ട്.
പൊലീസുമായുള്ള സംഘട്ടനത്തിൽ പരുക്കേറ്റ പ്രതികളെ പൊലീസ് സുരക്ഷയിൽ കാസർകോട് ജനറൽ ആശുപത്രിയിൽ പ്രവേശിപ്പിച്ചിരിക്കുകയാണ്. ഇവരിൽ നിന്ന് രക്ഷപ്പെട്ടവരെക്കുറിച്ചുള്ള വിവരം പോലീസിന് ലഭിച്ചിട്ടുണ്ട്. ഇവർക്കായി പൊലീസ് തെരച്ചിൽ ഊർജ്ജിതമാക്കിയിട്ടുണ്ട്. സംഭവത്തിൽ കൂടുതൽ അന്വേഷണം നടന്നുവരികയാണ്.
Story Highlights: Police in Kasaragod arrest two members of a robbery gang in a daring operation, while four others escape.
