Idukki Kumily case: Stepmother gets 10 years for attempted murder

കുമളിയിലെ ഹൃദയഭേദകമായ സംഭവത്തിന് 11 വർഷങ്ങൾക്കു ശേഷം നീതി ലഭിച്ചു. അഞ്ചു വയസ്സുകാരനായ ഷെഫീക്കിനെ കൊലപ്പെടുത്താൻ ശ്രമിച്ച കേസിൽ രണ്ടാനമ്മ അനീഷയ്ക്ക് 10 വർഷം തടവും കുട്ടിയുടെ പിതാവ് ഷെരീഫിന് 7 വർഷം തടവും ശിക്ഷ വിധിച്ച് തൊടുപുഴ സെഷൻസ് കോടതി. അനീഷയ്ക്ക് രണ്ട് ലക്ഷം രൂപ പിഴയും ഷെരീഫിന് 50,000 രൂപ പിഴയും അടയ്ക്കണമെന്ന് കോടതി നിർദേശിച്ചു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

വിവിധ വകുപ്പുകൾ പ്രകാരമാണ് ശിക്ഷ വിധിച്ചത്. അനീഷയ്ക്ക് ഐപിസി 307 വകുപ്പ് പ്രകാരം 10 വർഷം തടവും, 324 പ്രകാരം 3 വർഷം തടവും വിധിച്ചു. പ്രതികൾക്ക് ജീവപര്യന്തം ശിക്ഷ നൽകണമെന്ന പ്രോസിക്യൂഷൻ വാദം കോടതി തള്ളി. എന്നാൽ, ഒന്നാം പ്രതി സ്ത്രീയായതും ജീവിത സാഹചര്യം മോശമായിരുന്നതും മക്കളുണ്ടെന്നതും കോടതി പരിഗണിച്ചു.

2013 ജൂലൈ 15-നാണ് പട്ടിണി കിടന്ന് എല്ലും തോലുമായ നിലയിൽ ഷെഫീക്കിനെ കട്ടപ്പന സെന്റ് ജോൺസ് ആശുപത്രിയിൽ എത്തിച്ചത്. തലച്ചോറിന്റെ പ്രവർത്തനം 75 ശതമാനം നിലച്ചതും തുടർച്ചയായ അപസ്മാരവും മൂലം കുട്ടിയുടെ ജീവിതം ദുരിതപൂർണമായി. വർഷങ്ങൾ നീണ്ട ചികിത്സയ്ക്കുശേഷം ജീവൻ തിരിച്ചുപിടിച്ചെങ്കിലും തലച്ചോറിനേറ്റ പരുക്ക് കുട്ടിയുടെ മാനസിക വളർച്ചയെ ബാധിച്ചു. 2014-ൽ തൊടുപുഴ അൽ അഹ്സർ മെഡിക്കൽ കോളേജ് ഷെഫീക്കിന്റെയും സർക്കാർ നിയമിച്ച ആയ രാഗിണിയുടെയും ചുമതല ഏറ്റെടുത്തു.