ഭര്‍ത്താവ് ഭാര്യയെ കുത്തി പരിക്കേൽപ്പിച്ചു.

പാലക്കാട് : ഭർത്താവിനും മക്കൾക്കുമൊപ്പം സ്കൂട്ടറിൽ സഞ്ചരിക്കുകയായിരുന്ന വീട്ടമ്മയ്ക്ക് ഭർത്താവിന്റെ കുത്തേറ്റ് പരിക്ക്.സംഭവത്തിൽ മുണ്ടൂർ കീഴ്പാട് സ്വദേശി ശാന്തരാജിനെ (38) ഹേമാംബിക നഗർ പോലീസ് അറസ്റ്റ് ചെയ്തിട്ടുണ്ട്.

ശാന്തരാജിന്റെ ഭാര്യ സുനിതയാണ് (35) അക്രമണത്തിനു ഇരയായത്. ശാന്തരാജ് യുവതിയുടെ നെഞ്ചിലും വയറ്റിലും കത്തികൊണ്ട് കുത്തി പരിക്കേൽപ്പിക്കുകയായിരുന്നു.പത്തും ആറും വയസ്സുള്ള ഇവരുടെ കുട്ടികളും സ്കൂട്ടറിലുണ്ടായിരുന്നു.

ബുധനാഴ്ച രാവിലെ 9.30 മണിയോടെ മുട്ടിക്കുളങ്ങര വള്ളിക്കോട് വച്ചായിരുന്നു സംഭവം.ഭർത്താവുമായി പിണങ്ങി സുനിത കുറച്ചുദിവസങ്ങളായി സുഹൃത്തിനൊപ്പമായിരുന്നു താമസം.ആറ് വയസ്സുള്ള കുട്ടിയെയും ഒപ്പം കൊണ്ടുപോയിരുന്നു.തർക്കം പറഞ്ഞുപരിഹരിക്കുന്നതിനായി  ശാന്തരാജിനൊപ്പം മങ്കരയിൽനിന്ന് മുണ്ടൂരിലേക്ക് വരികയായിരുന്നു യുവതി.

എന്നാൽ വഴിമദ്ധ്യേ വച്ചുണ്ടായ വാക്കു തർക്കം മൂത്തതോടെ ശാന്തരാജ് യുവതിയെ കുത്തി പരിക്കേൽപ്പിക്കുകയായിരുന്നു.കുത്തേറ്റ് യുവതി ബഹളം വെക്കുകയും തുടർന്ന് ഓടിക്കൂടിയ നാട്ടുകാർ പൊലീസിൽ വിവരമറിയിക്കുകയുമായിരുന്നു. പോലീസ് സംഭവസ്ഥലത്തെത്തിയാണ് യുവതിയെ പാലക്കാട് ജില്ലാ ആശുപത്രിയിലെത്തിച്ചത്.ഇവർക്ക് മൂന്ന് കുട്ടികളാണുള്ളത്.

Story highlight : Husband stabbed and injured his wife.