ഭർത്താവിനെ ജോലിയിൽ നിന്നും പിരിച്ചുവിട്ടു; ഭാര്യ ആത്മഹത്യ ചെയ്തു.

കോലഞ്ചേരി : താൽക്കാലിക ജീവനക്കാരനായ ഭർത്താവിനെ ജോലിയിൽ നിന്നും പിരിച്ചുവിട്ട മനോവിഷമത്തിൽ ഭാര്യ  ജീവനൊടുക്കി. കോലഞ്ചേരി കറുകപ്പള്ളി പുല്ലിട്ടമോള സ്വാദേശിയായ സുരേന്ദ്രന്റെ ഭാര്യ സിന്ധു(45) വാണ് കിണറ്റിൽ ചാടി ആത്മഹത്യ ചെയ്തത്.

കഴിഞ്ഞ 18 ആം  തീയതി രാവിലെയാണ് സിന്ധു വീട്ടുമുറ്റത്തെ കിണറ്റിൽ ചാടിയത്. വീട്ടുകാരും നാട്ടുകാരുമൊന്നിച്ച് കോലഞ്ചേരി മെഡിക്കൽ മിഷൻ ആശുപത്രിയിലെത്തിച്ചെങ്കിലും 21ആം തീയതി മരണപ്പെടുകയായിരുന്നു.

കറുകപ്പള്ളി ഗവ. എൽപി സ്കൂളിലെ രണ്ടാം ക്ലാസ് വിദ്യാർഥി ഹരിനാരായണൻ ,യുകെജി വിദ്യാർഥി സാകേത് എന്നിവരാണ് മരണപ്പെട്ട സിന്ധുവിന്റെ മക്കൾ.

10 വർഷമായി ചൂണ്ടി വാട്ടർ അതോറിറ്റിയിലെ താൽക്കാലിക ജീവനക്കാരനായിരുന്നു സുരേന്ദ്രൻ.വാട്ടർ അതോറിറ്റിയിൽ മന്ത്രിതല മാറ്റമുണ്ടായതിനെ തുടർന്ന് പ്രാദേശിക രാഷ്ട്രീയ നേതൃത്വത്തിന്റെ ഇടപെടലിൽ സുരേന്ദ്രനെ ജോലിയിൽ നിന്നും നീക്കം ചെയ്തിരുന്നു.

ആഴ്ചയിൽ 3 ദിവസം 450 രൂപ ദിവസവേതനം കിട്ടുന്ന ജോലിക്കായി സുരേന്ദ്രൻ പലരെയും സമീപിച്ചെങ്കിലും എല്ലാവരും കൈമലർത്തുകയാണുണ്ടായത്.

ഭർത്താവിന്റെ ജോലി നഷ്ടമായതിനെ തുടർന്ന് കടുത്ത നിരാശയിലായിരുന്നു സിന്ധുവെന്ന് സമീപവാസികൾ പറയുന്നു. കോവിഡ് പ്രതിസന്ധിഘട്ടത്തിൽ സുരേന്ദ്രനും മറ്റൊരു ജോലി കണ്ടെത്താൻ കഴിഞ്ഞില്ല.

Story highlight: Husband loses job wife committed suicide.