തിരുവനന്തപുരം കഴക്കൂട്ടം ഇൻഫോസിസിന് സമീപം കെഎസ്ആർടിസി ബസിനു പിന്നിൽ സ്കൂട്ടർ ഇടിച്ച് അപകടം.
സംഭവത്തിൽ അച്ഛനും മകനും മരിച്ചു.സ്കൂട്ടർ യാത്രക്കാരായ രാജേഷ് (36) മകൻ ഋത്വിക് (5) എന്നിവരാണ് മരിച്ചത്.
ഇവർക്കൊപ്പം സ്കൂട്ടറിൽ സഞ്ചരിച്ചിരുന്ന രാജേഷിന്റെ ഭാര്യ സുജിതയെ ഗുരുതരമായി പരിക്കേറ്റതിനെ തുടർന്ന് ആശുപത്രിയിൽ പ്രവേശിപ്പിച്ചിരിക്കയാണ്.
ബാലരാമപുരത്ത് താമസിക്കുന്ന തൃശ്ശൂർ സ്വദേശികളാണിവർ.അലുമിനിയം ഫാബ്രിക്കേഷൻ കമ്പനിയിലെ സെയ്ൽസ് എക്സിക്യൂട്ടീവ് ആയാണ് രാജേഷ് ജോലിചെയ്തിരുന്നത്.
കുടുംബവുമൊത്ത് കിളിമാനൂരിലുള്ള സുഹൃത്തിന്റെ വീട്ടിലേക്ക് പോകുന്നതിനിടെയാണ് അപകടം.
ഇൻഫോസിസിന് സമീപം ചിത്തിര നഗർ ബസ് സ്റ്റോപ്പിൽ യാത്രക്കാരെ കയറ്റാനായി നിർത്തിയിട്ടിരിക്കുകയായിരുന്ന ബസിലേക്ക് അമിത വേഗത്തിൽ വന്ന സ്കൂട്ടർ ഇടിച്ചു കയറുകയായിരുന്നു.
അപകടം നടന്നയുടൻ മൂന്ന് പേരെയും ആശുപത്രിയിൽ എത്തിച്ചുവെങ്കിലും രാജേഷും മകനും മരണപ്പെട്ടിരുന്നു.
Story highlight : Father and son died in scooter accident at thiruvananthapuram.
