ബലാത്സംഗക്കേസിൽ എം മുകേഷിനെതിരെ തൃശൂരിലും കേസ്; മുൻകൂർ ജാമ്യാപേക്ഷ എതിർക്കാൻ അന്വേഷണ സംഘം

ബലാത്സംഗക്കേസിൽ എം മുകേഷിന് കൂടുതൽ പ്രതിസന്ധി നേരിടുന്നു. ആലുവ സ്വദേശിനിയായ നടിയുടെ പരാതിയിൽ തൃശൂരിലും മുകേഷിനെതിരെ കേസെടുത്തിരിക്കുകയാണ്. വടക്കാഞ്ചേരിയിലെ ഹോട്ടലിൽ വച്ച് മുകേഷ് അപമര്യാദയായി പെരുമാറിയെന്നാണ് നടിയുടെ ആരോപണം. വാഴാലിക്കാവിലെ ഷൂട്ടിംഗ് ചിത്രീകരണത്തിനിടയിലാണ് സംഭവം നടന്നതെന്ന് പരാതിയിൽ പറയുന്നു.

ഹോട്ടൽ മുറിയിൽ വച്ച് കയറി പിടിക്കാൻ ശ്രമിച്ചെന്നും ബെഡിലേക്ക് തള്ളിയിട്ടെന്നുമാണ് നടിയുടെ പരാതി. വടക്കാഞ്ചേരി പൊലീസാണ് മുകേഷിനെതിരെ കേസെടുത്തിരിക്കുന്നത്. നേരത്തെയെടുത്ത കേസിൽ പരാതിക്കാരിയുടെ രഹസ്യമൊഴി അന്വേഷണസംഘം രേഖപ്പെടുത്തിയിരുന്നു. ഈ സാഹചര്യത്തിൽ മുകേഷിന്റെ മുൻകൂർജാമ്യാപേക്ഷയെ എതിർക്കാനും, അദ്ദേഹത്തെ വിശദമായി ചോദ്യം ചെയ്യണമെന്ന് കോടതിയെ അറിയിക്കാനും അന്വേഷണസംഘം തീരുമാനിച്ചിട്ടുണ്ട്.

മുകേഷിന്റെ രാജി ആവശ്യപ്പെട്ടുള്ള പ്രതിഷേധം ശക്തമാകുന്നുണ്ടെങ്കിലും, എൽഡിഎഫ് നേതൃത്വം ഈ ആവശ്യം തള്ളുകയാണ്. എന്നാൽ പ്രതിപക്ഷം രാജി ആവശ്യപ്പെട്ടുള്ള പ്രതിഷേധം തുടരുമെന്ന നിലപാടിലാണ്. നടിയുടെ പരാതി ബ്ലാക്ക് മെയിലിംഗ് ആണെന്നാണ് മുകേഷിന്റെ വാദം. ഇതിന്റെ തെളിവുകൾ അദ്ദേഹം അഭിഭാഷകന് കൈമാറിയിട്ടുണ്ട്. രഹസ്യ മൊഴിക്ക് പിന്നാലെ മുകേഷിന്റെ കൊച്ചിയിലെ വില്ലയിലും അന്വേഷണസംഘം പരിശോധന നടത്തിയിരുന്നു.

Story Highlights: Case registered against M Mukesh in Thrissur based on actress complaint