പാലക്കാട് വടക്കഞ്ചേരിയിൽ സിനിമാ സ്റ്റൈലിൽ നടന്ന പോത്ത് കവർച്ച സംഭവത്തിൽ രണ്ട് പേർ പോലീസ് പിടിയിലായി. ചീരക്കുഴി സ്വദേശികളായ ഷമീർ, ഷജീർ എന്നിവരാണ് അറസ്റ്റിലായത്. ഇന്നലെ പുലർച്ചെ നാലു മണിയോടെയാണ് സംഭവം നടന്നത്.
വിശാഖപട്ടണത്ത് നിന്ന് കായംകുളത്തേക്ക് പോത്തുകളുമായി പോയ ലോറി വടക്കഞ്ചേരിയിലെത്തിയപ്പോൾ കാർ, ജീപ്പ്, ബൈക്ക് എന്നിവയിലായി എത്തിയ 10 അംഗ സംഘം ലോറി തടഞ്ഞുനിർത്തി അൻപതോളം പോത്തുകളെ കവർന്നു. കോയമ്പത്തൂർ ദേശീയപാതയിൽ നിന്നും കവർന്ന പോത്തുകളെ 4 കിലോമീറ്റർ അകലെയുള്ള വേങ്ങശ്ശേരിയിൽ ഇറക്കിവിട്ട ശേഷം ലോറി ഉപേക്ഷിച്ചു.
ലോറിയിലുണ്ടായിരുന്ന വിശാഖപട്ടണം സ്വദേശികളായ ഡ്രൈവറെയും ക്ലീനറെയും 4 മണിക്കൂറോളം വടക്കഞ്ചേരി ടൗണിലൂടെ കറക്കിയ ശേഷം റോഡിൽ ഇറക്കിവിട്ടു. ലോറി ഉടമയുടെ പരാതിയിൽ വടക്കഞ്ചേരി പൊലീസ് കേസെടുത്തു. മറ്റ് പ്രതികൾക്കായുള്ള അന്വേഷണം ആരംഭിച്ചു. ഇറച്ചി വിൽപ്പന നടത്തുന്നവരാണ് മോഷണം നടത്തിയതെന്നാണ് പൊലീസിന് ലഭിച്ച വിവരം.
