Aditi Rao Hydari and Siddharth tie the knot in surprise wedding

തെന്നിന്ത്യൻ നടി അദിതി റാവു ഹൈദരിയും നടൻ സിദ്ധാർഥും വിവാഹിതരായതായി അറിയിച്ചു. ഇരുവരും തങ്ങളുടെ സോഷ്യൽ മീഡിയ അക്കൗണ്ടുകളിലൂടെയാണ് ഈ സന്തോഷവാർത്ത പങ്കുവച്ചത്. ‘മിസിസ് ആൻഡ് മിസ്റ്റർ അദു-സിദ്ധു’ എന്ന തലക്കെട്ടോടെയാണ് പോസ്റ്റ് ചെയ്തിരിക്കുന്നത്. ഇരുവരും വിവാഹിതരാകാൻ പോകുന്നുവെന്ന വാർത്തകൾ കുറച്ചു നാളുകളായി പ്രചരിച്ചിരുന്നു. ഇതോടെയാണ് ഈ ‘സർപ്രൈസ് വെഡിങ്’ വാർത്ത പുറത്തുവന്നത്. 2021-ൽ ‘മഹാസമുദ്രം’ എന്ന തെലുങ്ക് ചിത്രത്തിൽ അദിതിയും സിദ്ധാർഥും ഒന്നിച്ച് അഭിനയിച്ചിരുന്നു. അന്നു മുതൽ ഇരുവരും പ്രണയത്തിലാണെന്ന അഭ്യൂഹങ്ങൾ പ്രചരിച്ചിരുന്നു. ഒടുവിൽ തങ്ങൾ പ്രണയത്തിലാണെന്നും വിവാഹം ചെയ്യാൻ പോകുകയാണെന്നും ഇരുവരും ഔദ്യോഗികമായി സ്ഥിരീകരിച്ചിരുന്നു. തെന്നിന്ത്യൻ സിനിമകളിൽ ശ്രദ്ധേയമായ സാന്നിധ്യമായ അദിതി ബോളിവുഡിലും വേഷങ്ങൾ ചെയ്തിട്ടുണ്ട്. ‘സൂഫിയും സുജാതയും’ ആണ് അദിതി അവസാനമായി അഭിനയിച്ച മലയാള ചിത്രം. നിരവധി തമിഴ് ചിത്രങ്ങളിൽ അഭിനയിച്ചിട്ടുള്ള നടനാണ് സിദ്ധാർഥ്. ‘കന്നത്തിൽ മുത്തമിട്ടാൽ’ എന്ന ചിത്രത്തിൽ അസിസ്റ്റന്റ് ഡയറക്ടറായി പ്രവർത്തിച്ച അദ്ദേഹം ‘ബോയ്സ്’ എന്ന ചിത്രത്തിലൂടെയാണ് അഭിനയരംഗത്തേക്ക് കടന്നുവന്നത്. മലയാള ചിത്രമായ ‘കമ്മാരസംഭവ’ത്തിലും ഒരു പ്രധാന വേഷം ചെയ്ത സിദ്ധാർഥിന്റെ ഏറ്റവും പുതിയ ചിത്രം ‘ഇന്ത്യൻ 2’ ആണ്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here