സംസ്ഥാനത്ത് വർധിച്ചുവരുന്ന കോവിഡ് വ്യാപനം കണക്കിലെടുത്ത് നിയന്ത്രണങ്ങൾ പൊളിച്ചെഴുതാനൊരുങ്ങി സർക്കാർ. കേരളത്തിലെ കോവിഡ് പ്രതിരോധത്തിൽ അശാസ്ത്രീയതയുണ്ടെന്ന വിമർശനം വിവിധ രാഷ്ട്രീയ പാർട്ടികളും സംഘടനകളും ഉന്നയിച്ചിരുന്നു.
കോവിഡ് വ്യാപനം താരതമ്യേന കുറഞ്ഞ പ്രദേശങ്ങൾ ഘട്ടങ്ങളായി തുറക്കുകയും അതിതീവ്ര വ്യാപന മേഖലകൾ മാത്രം അടച്ചിടുകയും ചെയ്യുന്നതാണ് പരിഗണനയിലുള്ളത്.
10 ശതമാനത്തിലധികം രോഗ സ്ഥിരീകരണ നിരക്കുള്ള പ്രദേശങ്ങൾ ക്ലസ്റ്ററുകളായി തിരിച്ച് നിയന്ത്രണം കൊണ്ടുവരും. വിഷയത്തിൽ കേന്ദ്ര വിദഗ്ധസംഘവുമായി ചർച്ച നടന്നു.
മദ്യവിൽപ്പനശാലകൾക്ക് മുന്നിലെ തിരക്ക് നിയന്ത്രിക്കുന്നതും പരിഗണനയിലുണ്ട്. എല്ലാ ദിവസവും തുറന്ന് പ്രവർത്തിക്കുന്ന വ്യാപാര സ്ഥാപനങ്ങളിലെ ജീവനക്കാർക്ക് ആഴ്ചയിൽ ഒരിക്കൽ കോവിഡ് പരിശോധന നിർബന്ധമാക്കും.
പ്രതിദിന കോവിഡ് പരിശോധനകൾ രണ്ടുലക്ഷത്തോളമാക്കി ഉയർത്തിയേക്കും. കഴിഞ്ഞ അവലോകനയോഗത്തിൽ മുഖ്യമന്ത്രി പിണറായി വിജയൻ നിയന്ത്രണങ്ങളിൽ അതൃപ്തി പ്രകടമാക്കിയിരുന്നു.
അതേസമയം കേരളത്തിൽ അഞ്ചു ദിവസത്തിനിടയിൽ ഒരു ലക്ഷംപേർക്കാണ് കോവിഡ് ബാധിച്ചത്.
Story Highlights: New covid guidelines to be released in Kerala
