മധ്യപ്രദേശിലെ റായ്‌സണ്‍ ജില്ലയില്‍ നടന്ന ഞെട്ടിക്കുന്ന സംഭവത്തില്‍ പ്രായപൂര്‍ത്തിയാകാത്ത പെണ്‍കുട്ടി പീഡനത്തിനിരയായി. വനത്തിലെ ക്ഷേത്രത്തില്‍ നിന്ന് മടങ്ങുകയായിരുന്ന 15 വയസ്സുകാരിയെയാണ് ആക്രമികള്‍ പീഡിപ്പിച്ചത്. സംഭവവുമായി ബന്ധപ്പെട്ട് ട്രക്ക് ഡ്രൈവറടക്കം രണ്ടുപേരെ പൊലീസ് അറസ്റ്റ് ചെയ്തു.
ശനിയാഴ്ച വൈകുന്നേരം സില്‍വാനി-സാഗര്‍ റോഡിലുള്ള സിയാര്‍മൗ വനത്തിലെ വന്‍ദേവി ക്ഷേത്രം സന്ദര്‍ശിച്ച് മടങ്ങുകയായിരുന്നു പെണ്‍കുട്ടിയും ആണ്‍സുഹൃത്തും. ഇവര്‍ സഞ്ചരിച്ചിരുന്ന ഇരുചക്രവാഹനത്തിന്റെ താക്കോല്‍ കൈക്കലാക്കിയ പ്രതികള്‍, സുഹൃത്തിനെ മര്‍ദിച്ച് അവശനാക്കി കെട്ടിയിട്ടശേഷം പെണ്‍കുട്ടിയെ ബലമായി ഉള്‍ക്കാട്ടിലേക്ക് കൊണ്ടുപോയി പീഡിപ്പിക്കുകയായിരുന്നു.
കൃത്യം നടത്തിയശേഷം പ്രതികള്‍ രക്ഷപ്പെട്ടു. വനത്തില്‍നിന്ന് പുറത്തെത്തിയ ഇരകള്‍ അതുവഴി കടന്നുപോയ പൊലീസ് ഉദ്യോഗസ്ഥരെ വിവരം അറിയിച്ചതോടെയാണ് സംഭവം പുറത്തറിഞ്ഞത്. സജ്ഞു ആദിവാസി (21), ശിവനാരായണ്‍, അക്ഷയ് അഹിര്‍വാര്‍ എന്നിവര്‍ക്കെതിരെ പീഡനം, കൂട്ടബലാത്സംഗം, പോക്സോ വകുപ്പുകള്‍ ചുമത്തി കേസെടുത്തിട്ടുണ്ട്.
Story Highlights: Minor girl raped in Madhya Pradesh forest, two arrested including truck driver
