കുറുവ സംഘാംഗം സന്തോഷ് സെല്‍വം പൊലീസ് കസ്റ്റഡിയില്‍ നിന്നും രക്ഷപ്പെട്ടതിന് ശേഷം അതിസാഹസികമായി പിടിയിലായി. തമിഴ്‌നാട് സ്വദേശിയായ ഇയാള്‍ കൈവിലങ്ങോടെയാണ് രക്ഷപ്പെട്ടത്. ആലപ്പുഴയിലേക്ക് ചോദ്യം ചെയ്യാനായി കൊണ്ടുപോകുമ്പോഴാണ് പൊലീസിനെ ആക്രമിച്ച് കടന്നുകളഞ്ഞത്. രക്ഷപ്പെട്ട് മണിക്കൂറുകള്‍ക്ക് ശേഷമാണ് ഇയാള്‍ പിടിയിലായത്.
കഴിഞ്ഞ രണ്ടാഴ്ചയോളമായി ആലപ്പുഴ മണ്ണഞ്ചേരി പ്രദേശങ്ങളില്‍ കുറുവ മോഷണ സംഘത്തിന്റെ സാന്നിധ്യം മനസിലാക്കിയ പൊലീസ് അന്വേഷണം നടത്തിയിരുന്നു. തമിഴ്‌നാട്ടിലുള്ളവരെ ചോദ്യം ചെയ്യുന്നതിനിടയിലാണ് കുറുവാ സംഘത്തില്‍ പെട്ട സന്തോഷ് എന്നയാള്‍ കുണ്ടന്നൂര്‍ പാലത്തിന് അടിയില്‍ താമസിക്കുന്ന വിവരം ലഭിച്ചത്.
ഈ വിവരത്തിന്റെ അടിസ്ഥാനത്തില്‍ ആലപ്പുഴ ഡിവൈഎസ്പിയുടെ നേതൃത്വത്തിലുള്ള പൊലീസ് സംഘം കുണ്ടന്നൂരിലെത്തി രണ്ടുപേരെ കസ്റ്റഡിയിലെടുത്തു. ഇതിലൊരാള്‍ സന്തോഷായിരുന്നു. എന്നാല്‍ ഇയാളെ സ്റ്റേഷനിലേക്ക് കൊണ്ടുവരുന്നതിനിടയില്‍ പരപ്പന സമീപം വെച്ച് പൊലീസിനെ അക്രമിച്ച ശേഷം സന്തോഷ് രക്ഷപ്പെടുകയായിരുന്നു. എന്നാല്‍ പിന്നീട് അതിസാഹസികമായി ഇയാളെ പിടികൂടാന്‍ പൊലീസിന് സാധിച്ചു.
Story Highlights: Kuruva gang member Santhosh Selvam escapes police custody, later caught in daring operation
