എറണാകുളം പറവൂർ കുമാരമംഗലത്ത് കുറുവസംഘം എത്തിയെന്ന സംശയം ഉയർന്നിരിക്കുകയാണ്. അഞ്ച് വീടുകളിലാണ് കുറുവസംഘം എന്ന് സംശയിക്കുന്ന രണ്ടുപേർ എത്തിയത്. അർദ്ധനഗ്നരായി മുഖം മറച്ച് കയ്യിൽ ആയുധങ്ങളുമായാണ് ഇവർ എത്തിയത്. രണ്ട് വീടുകളിലെ സിസിടിവികളിൽ ഇരുവരുടെയും ദൃശ്യം പതിഞ്ഞിട്ടുണ്ട്. വീടുകളുടെ പിന്നാമ്പുറത്തുള്ള വാതിൽ പൊളിക്കാനായിരുന്നു ഇവരുടെ ശ്രമം.
ഒറ്റക്ക് താമസിക്കുന്ന വയോജനങ്ങളെയും സ്ത്രീകളെയും ലക്ഷ്യം വെച്ചാണ് തസ്കരസംഘത്തിന്റെ നീക്കമെന്നാണ് സൂചന. പൊലീസിൽ പരാതി നൽകിയെങ്കിലും നാട്ടുകാർ കടുത്ത ആശങ്കയിലാണ്. എന്നാൽ, പ്രദേശത്ത് എത്തിയത് കുറുവ സംഘമാണെന്ന് പൊലീസ് ഇതുവരെ സ്ഥിരീകരിച്ചിട്ടില്ല. പ്രാദേശിക മോഷണ സംഘങ്ങൾ കുറുവ വേഷം ധരിച്ച് എത്തിയതാണോ എന്നും സംശയമുണ്ട്.
എറണാകുളം റൂറൽ പൊലീസ് സംഭവത്തിൽ അന്വേഷണം ആരംഭിച്ചിട്ടുണ്ട്. പ്രദേശത്ത് രാത്രികാല പരിശോധന അടക്കം കർശനമാക്കിയതായി പൊലീസ് അറിയിച്ചു. മോഷ്ടാക്കളുടെ നിർണായക സിസിടിവി ദൃശ്യങ്ങൾ 24 ന് ലഭിച്ചതായും റിപ്പോർട്ടുകളുണ്ട്. ആലപ്പുഴയ്ക്ക് പിന്നാലെയാണ് എറണാകുളത്തും ഇത്തരം സംഭവം റിപ്പോർട്ട് ചെയ്യപ്പെട്ടിരിക്കുന്നത്.
Story Highlights: Suspected Kuruva gang activity in Ernakulam’s Paravur Kumaramangalam, CCTV footage obtained, police investigation underway
