കോഴിക്കോട് നടന്ന ഒരു ഗുരുതരമായ വാഹനാപകടത്തിൽ പരിക്കേറ്റയാളെ ആശുപത്രിയിലേക്ക് കൊണ്ടുപോകുന്നതിനു പകരം റെയിൽവേ ട്രാക്കിൽ ഉപേക്ഷിച്ച സംഭവത്തിൽ പ്രതിയെ കസബ പൊലീസ് പിടികൂടി. കൊല്ലം സ്വദേശിയായ ബിജു കുമാർ (42) ആണ് അറസ്റ്റിലായത്. കഴിഞ്ഞ ആഗസ്റ്റ് എട്ടിനാണ് സംഭവം നടന്നത്. മാവൂർ റോഡിൽ വെച്ച് ബിജു കുമാർ ഓടിച്ച ടൂവീലർ ഇടിച്ച് മാളിക്കടവ് സ്വദേശി രവി (58)ക്ക് ഗുരുതരമായി പരിക്കേറ്റു.
നാട്ടുകാരുടെ സഹായത്തോടെ രവിയെ ആശുപത്രിയിലേക്ക് കൊണ്ടുപോകുന്നതായി പറഞ്ഞ് ഓട്ടോയിൽ കയറ്റിയ പ്രതി, പിന്നീട് അദ്ദേഹത്തെ റെയിൽവേ ട്രാക്കിന് സമീപം ഉപേക്ഷിച്ച് രക്ഷപ്പെടുകയായിരുന്നു. പരാതിയിൽ അന്വേഷണം നടത്തിയ പൊലീസ്, വാഹനത്തിന്റെ നമ്പർ കണ്ടെത്തി ആർസി ഉടമയെ കണ്ടെത്തി. എന്നാൽ വാഹനം ആറു വർഷം മുമ്പ് മറ്റൊരാൾക്ക് വിറ്റതായി അറിയാൻ കഴിഞ്ഞു.
പുതിയ ഉടമയെക്കുറിച്ച് വിവരങ്ങൾ ലഭ്യമല്ലാതിരുന്നതിനാൽ, സമാന രജിസ്ട്രേഷൻ നമ്പറിലുള്ള വെള്ള സ്കൂട്ടർ ഉപയോഗിക്കുന്നവരെക്കുറിച്ച് അന്വേഷിച്ചാണ് പ്രതിയെ കണ്ടെത്തിയത്. വാഹനാപകടം കൂടാതെ, പരിക്കേറ്റയാളെ ഉപേക്ഷിച്ചതിനും ലൈസൻസില്ലാതെ വാഹനം ഓടിച്ചതിനും അധിക വകുപ്പുകൾ ചുമത്തുമെന്ന് കസബ പൊലീസ് അറിയിച്ചു. കസബ ഇൻസ്പെക്ടർ ഗോപകുമാർ ജി, എസ്ഐ സജേഷ് കുമാർ പി, സിപിഒ മുഹമ്മദ് അബ്ദുറഹിമാൻ എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.
Story Highlights: Kozhikode police arrest man who abandoned accident victim on railway track instead of taking him to hospital
