ഉത്തർ പ്രദേശിലെ കാൻപൂരിൽ നാല് മാസം മുൻപ് കാണാതായ 32 കാരിയായ ഏക്താ ഗുപ്തയുടെ മൃതദേഹം ക്ലബ്ബിനുള്ളിൽ കുഴിച്ചിട്ട നിലയിൽ കണ്ടെത്തി. സംഭവത്തിൽ ജിം ട്രെയിനർ സോണിയെ പൊലീസ് അറസ്റ്റ് ചെയ്തു. ഇയാളിൽ നിന്നാണ് പൊലീസിന് നിർണ്ണായക വിവരങ്ങൾ ലഭിച്ചത്. തങ്ങൾ ഇരുവരും പ്രണയത്തിലായിരുന്നുവെന്നും ഏക്താ ഗുപ്ത തന്റെ വിവാഹത്തെ എതിർത്തത് മൂലമുള്ള തർക്കമാണ് കൊലപാതകത്തിലേക്ക് നയിച്ചതെന്നും സോണി പൊലീസിനോട് വെളിപ്പെടുത്തി.
ജൂൺ ഇരുപത്തിനാലിനാണ് കേസിന് ആസ്പദമായ സംഭവം ഉണ്ടായത്. അന്ന് ഏക്തയും സോണിയും തമ്മിൽ ജിമ്മിൽ വെച്ച് വാക്കുതർക്കത്തിൽ ഏർപ്പെട്ടിരുന്നു. തുടർന്ന് കാറിൽ പോയ ഇവർ വീണ്ടും വാക്കുതർക്കത്തിൽ ഏർപ്പെടുകയും ഒടുവിലിത് കൊലപാതകത്തിൽ കലാശിക്കുകയുമായിരുന്നു. യുവതിയുടെ മൃതദേഹം കുഴിച്ചിട്ട സ്ഥലം പൊലീസിനെ കാണിച്ചതും സോണി തന്നെയാണ്. കൊലപാതക കേസിൽ സോണിക്കെതിരെ ഇന്ത്യൻ പീനൽ കോഡിലെ പ്രധാന വകുപ്പുകൾ പ്രകാരം കേസെടുത്തിട്ടുണ്ട്.
എന്നാൽ, സംഭവത്തിൽ സോണി ഉയർത്തിയ ആരോപണങ്ങൾ നിഷേധിച്ചുകൊണ്ട് ഏക്തയുടെ ഭർത്താവ് രംഗത്ത് വന്നു. ജിം ട്രെയിനറും തന്റെ ഭാര്യയും തമ്മിൽ പ്രണയത്തിലായിരുന്നുവെന്ന പ്രചാരണം അടിസ്ഥാന രഹിതമാണെന്നാണ് അദ്ദേഹം പ്രതികരിച്ചത്. ഈ സംഭവം ഉത്തർ പ്രദേശിലെ കാൻപൂരിൽ വലിയ ചർച്ചയായി മാറിയിരിക്കുകയാണ്.
Story Highlights: Missing woman’s body found buried in club in Kanpur, gym trainer arrested for murder
