കേന്ദ്ര സർക്കാർ വിലക്കയറ്റത്തെ നേരിടാനായി പുതിയ നീക്കം ആരംഭിച്ചിരിക്കുകയാണ്. ഭാരത് ബ്രാൻഡ് ഉൽപ്പന്നങ്ങൾ റിലയൻസ് റീടെയ്ൽ വഴി ഓൺലൈനായി വിൽക്കാനുള്ള ശ്രമമാണ് സർക്കാർ നടത്തുന്നത്. ഇക്കണോമിക് ടൈംസ് റിപ്പോർട്ട് അനുസരിച്ച്, കേന്ദ്ര സർക്കാരിലെ ഉന്നതർ ഇത് സ്ഥിരീകരിച്ചിട്ടുണ്ട്. ഇതാദ്യമായാണ് സബ്സിഡി നിരക്കിൽ ഉൽപ്പന്നങ്ങൾ വിൽക്കാൻ സർക്കാർ ഒരു സ്വകാര്യ കമ്പനിയുമായി ദീർഘകാല കരാറിൽ ഏർപ്പെടുന്നത്.
റിലയൻസ് റീടെയ്ൽ കമ്പനി പ്രതിനിധികളും കേന്ദ്ര സർക്കാർ പ്രതിനിധികളും തമ്മിൽ ചർച്ച പുരോഗമിക്കുന്നുണ്ടെങ്കിലും കൂടുതൽ വിവരങ്ങൾ പുറത്തുവിട്ടിട്ടില്ല. ഭക്ഷ്യധാന്യങ്ങൾ, പയർ വർഗങ്ങൾ, സുഗന്ധ വ്യഞ്ജനങ്ങൾ, എണ്ണക്കുരു, ഉള്ളി എന്നിവയ്ക്കൊപ്പം ചില കൺസ്യൂമർ ഉൽപ്പന്നങ്ങളാണ് ഭാരത് ബ്രാൻഡിന് കീഴിലുള്ളത്. ഈ ഉൽപ്പന്നങ്ങൾ മിതമായ നിരക്കിൽ ജനങ്ങൾക്ക് ലഭ്യമാക്കാനായി കേന്ദ്ര സർക്കാർ കൊണ്ടുവന്ന പദ്ധതിയാണ് ഭാരത് ബ്രാൻഡ്.
റിലയൻസ് റീടെയ്‌ലുമായുള്ള ചർച്ച വിജയകരമായാൽ, കൂടുതൽ ജനങ്ങളിലേക്ക് ഭാരത് ബ്രാൻഡ് ഉൽപ്പന്നങ്ങൾ എത്തിക്കാൻ സാധിക്കുമെന്ന് കേന്ദ്രസർക്കാർ പ്രതീക്ഷിക്കുന്നു. ഇതുവഴി വിലക്കയറ്റത്തെ ഫലപ്രദമായി നേരിടാനാകുമെന്നാണ് സർക്കാരിന്റെ കണക്കുകൂട്ടൽ. ഓൺലൈൻ വിപണനം വഴി ഉൽപ്പന്നങ്ങളുടെ ലഭ്യത വർധിപ്പിക്കാനും അതുവഴി വില നിയന്ത്രിക്കാനുമാണ് ഈ നീക്കത്തിലൂടെ സർക്കാർ ലക്ഷ്യമിടുന്നത്.
Story Highlights: Government in talks with Reliance Retail to sell subsidized ‘Bharat’ brand products online to combat inflation
