വിക്കിപീഡിയയ്ക്ക് കേന്ദ്ര സർക്കാരിന്റെ നോട്ടീസ്; പക്ഷപാതിത്വവും തെറ്റായ വിവരങ്ങളും നൽകുന്നുവെന്ന് പരാതി

കേന്ദ്ര സർക്കാർ വിക്കിപീഡിയയ്ക്ക് നോട്ടീസ് അയച്ചിരിക്കുകയാണ്. പക്ഷപാതിത്വവും തെറ്റായ വിവരങ്ങളും നൽകുന്നുവെന്ന പരാതിയുടെ അടിസ്ഥാനത്തിലാണ് ഈ നടപടി. വിക്കിപീഡിയയെ പബ്ലിഷറായി പരിഗണിക്കരുതെന്നും കേന്ദ്രസർക്കാരിന് ലഭിച്ച പരാതികളിൽ പറയുന്നു. പരാതികൾ വർധിച്ചതോടെയാണ് സർക്കാർ ഇത്തരമൊരു നടപടിയിലേക്ക് നീങ്ങിയത്. ഡൽഹി ഹൈക്കോടതിയിൽ വിക്കിപീഡിയക്കെതിരായ നിയമപോരാട്ടത്തിനിടയിലാണ് ഈ നോട്ടീസ് അയച്ചത്. വാർത്താ ഏജൻസിയായ എഎൻഐ, തങ്ങളെക്കുറിച്ച് വിക്കിപീഡിയയിൽ തെറ്റായ വിവരങ്ങളുണ്ടെന്ന് ചൂണ്ടിക്കാട്ടി ഹർജി നൽകിയിരുന്നു. എഎൻഐയുടെ എൻട്രിയിൽ എഡിറ്റുകൾ നടത്തിയ ഉപയോക്താക്കളെക്കുറിച്ചുള്ള വിവരങ്ങളും ആവശ്യപ്പെട്ടിരുന്നു. കേന്ദ്ര സർക്കാരിന്റെ പ്രോപഗണ്ട ടൂൾ എന്നാണ് എഎൻഐയെ വിക്കിപീഡിയയിൽ വിശേഷിപ്പിച്ചിരിക്കുന്നത്. സൗജന്യ എൻസൈക്ലോപീഡിയയെന്നാണ് വിക്കിപീഡിയ അവകാശപ്പെടുന്നത്. വളണ്ടിയർമാർക്ക് പുതിയ പേജുകൾ ചേർക്കാനും നിലവിലുള്ള ഉള്ളടക്കം തിരുത്താനും സാധിക്കും. എന്നാൽ, വിക്കിപീഡിയ ഒരു വിജ്ഞാനകോശമാണെന്ന അവകാശവാദം വിഷമകരമാണെന്ന് കോടതി ചൂണ്ടിക്കാട്ടി. കഴിഞ്ഞ മാസം, ഇതേ വിഷയത്തിൽ പ്രത്യേക വാദം കേൾക്കുമ്പോൾ, തിരുത്തലുകൾ വരുത്തിയ ഉപയോക്താക്കളുടെ വിവരങ്ങൾ തടഞ്ഞുവച്ചതിന് വിക്കിപീഡിയയ്ക്ക് ഹൈക്കോടതി കോടതിയലക്ഷ്യ നോട്ടീസ് അയച്ചിരുന്നു. Story Highlights: Government issues notice to Wikipedia over complaints of bias and misinformation