മുംബൈയിൽ നിന്ന് ഇസ്താംബൂളിലേക്കും ജോധ്പൂരിൽ നിന്ന് ഡൽഹിയിലേക്കുമുള്ള വിമാനങ്ങൾ ഉൾപ്പെടെ ആകാസയുടെയും ഇൻഡിഗോയുടെയും അഞ്ച് വീതം വിമാനങ്ങൾക്ക് ബോംബ് ഭീഷണി സന്ദേശങ്ങൾ ലഭിച്ചു. കേന്ദ്ര അന്വേഷണ ഏജൻസികൾ ഉൾപ്പെടെയുള്ള സംയുക്ത അന്വേഷണം തുടരുന്നതിനിടെയാണ് വീണ്ടും സന്ദേശങ്ങൾ എത്തിയത്. ഇതോടെ ഒരാഴ്ചയ്ക്കിടെ 70 വിമാനങ്ങൾക്ക് നേരെയാണ് ബോംബ് ഭീഷണി ഉണ്ടായത്.
യാത്രക്കാരുടെ സുരക്ഷയ്ക്കാണ് പ്രാധാന്യമെന്ന് ഇൻഡിഗോ വിമാന കമ്പനി അധികൃതർ വ്യക്തമാക്കി. ഡൽഹിയിൽ നിന്ന് ലണ്ടനിലേക്ക് പുറപ്പെട്ട വിസ്താര വിമാനത്തിന് ഭീഷണി സന്ദേശം ലഭിച്ചതിനെ തുടർന്ന് ജർമ്മനിയിലെ ഫ്രാങ്ക്ഫർട്ടിലേക്ക് തിരിച്ചുവിട്ടു. വിമാനം സുരക്ഷിതമായി ഫ്രാങ്ക്ഫർട്ട് വിമാനത്താവളത്തിൽ ഇറക്കി പരിശോധനകൾ നടത്തിയെന്നും സുരക്ഷാ ഏജൻസികൾ അനുമതി നൽകിയാൽ ലക്ഷ്യ സ്ഥാനത്തേക്ക് പുറപ്പെടുമെന്നും വിസ്താരയുടെ അധികൃതർ അറിയിച്ചു.
ദുബായ് – ഡൽഹി എയർ ഇന്ത്യ എക്സ്പ്രസ് വിമാനത്തിന് നേരെയും ബോംബ് ഭീഷണി ഉണ്ടായി. ഇ-മെയിലിലൂടെ ഭീഷണി സന്ദേശം ലഭിച്ചതിനെ തുടർന്ന് പുലർച്ചെ 1.20 ന് വിമാനം ജയ്പൂരിൽ ഇറക്കി പരിശോധന നടത്തിയെങ്കിലും സംശയാസ്പദമായി ഒന്നും കണ്ടെത്താനായില്ല. ഈ സംഭവങ്ങൾ വിമാന യാത്രക്കാരിൽ ആശങ്ക സൃഷ്ടിച്ചിട്ടുണ്ട്. എന്നാൽ, വിമാന കമ്പനികളും സുരക്ഷാ ഏജൻസികളും സുരക്ഷാ നടപടികൾ കർശനമാക്കിയിട്ടുണ്ട്.
Story Highlights: Multiple airlines receive bomb threats, IndiGo emphasizes passenger safety as top priority
