ഒഡിഷയിലെ കട്ടക്കില്‍ ഒരു സ്വകാര്യ ആശുപത്രിയിലെ ഡോക്ടര്‍ക്കെതിരെ ഗുരുതരമായ ആരോപണം ഉയര്‍ന്നിരിക്കുകയാണ്. മിനി ട്രക്കിടിച്ച് ആശുപത്രിയില്‍ പ്രവേശിപ്പിച്ച 44 വയസ്സുകാരനായ ബാബു ദിഗാല്‍ എന്ന ഒഡിഷ സ്വദേശിയുടെ അവയവങ്ങള്‍ ഡോക്ടര്‍ മോഷ്ടിച്ചെന്നാണ് മരിച്ചയാളുടെ വീട്ടുകാര്‍ ഉന്നയിക്കുന്ന പരാതി.
ഒക്ടോബര്‍ 13-ന് ബിസിനസുകാരനായ ബാബു ദിഗാല്‍ മോട്ടോര്‍ സൈക്കിളില്‍ ഭാര്യയ്ക്കും മകനുമൊപ്പം സഞ്ചരിക്കുമ്പോഴാണ് അപകടത്തില്‍പ്പെട്ടത്. തലയ്ക്ക് പരിക്കേറ്റ് ആശുപത്രിയിലെത്തിച്ച ബാബു ദിഗാല്‍ ഒക്ടോബര്‍ 16-ന് മരിച്ചതായി ഡോക്ടര്‍മാര്‍ അറിയിച്ചു. എന്നാല്‍ മൃതദേഹത്തിന്റെ വയറില്‍ ശസ്ത്രക്രിയയുടെ പാടുകള്‍ കണ്ടതോടെയാണ് കുടുംബം സംശയം പ്രകടിപ്പിച്ചത്.
പോസ്റ്റ്‌മോര്‍ട്ടം നടത്താതെയും പൊലീസിനെ അറിയിക്കാതെയുമാണ് ആശുപത്രി അധികൃതര്‍ മൃതദേഹം ബന്ധുക്കള്‍ക്ക് വിട്ടുകൊടുത്തത്. കുടുംബത്തിന്റെ പരാതിയെ തുടര്‍ന്ന് സംസ്‌കാരം നടത്തിയ മൃതദേഹം പുറത്തെടുത്ത് പൊലീസ് പോസ്റ്റ്‌മോര്‍ട്ടം നടത്തി. റിപ്പോര്‍ട്ട് ലഭിച്ചാല്‍ മാത്രമേ കൂടുതല്‍ വിവരങ്ങള്‍ അറിയാന്‍ കഴിയുവെന്ന് പൊലീസ് വ്യക്തമാക്കി. സംഭവത്തില്‍ അന്വേഷണം പുരോഗമിക്കുകയാണ്.
Story Highlights: Family accuses doctor of organ theft after Odisha man dies in hospital following accident
