ബീഹാറിലെ അറായില്‍ ദുര്‍ഗാപൂജ പന്തലില്‍ ഞായറാഴ്ച പുലര്‍ച്ചെ നടന്ന വെടിവയ്പ്പില്‍ നാല് പേര്‍ക്ക് പരിക്കേറ്റു. രണ്ട് മോട്ടോര്‍ സൈക്കിളുകളിലായെത്തിയ സംഘം ആളുകള്‍ക്ക് നേരെ വെടിയുതിര്‍ത്ത് ശേഷം രക്ഷപ്പെടുകയായിരുന്നെന്ന് ദൃക്‌സാക്ഷികള്‍ പറഞ്ഞു. അര്‍മാന്‍ അന്‍സാരി (19), സുനില്‍ കുമാര്‍ യാദവ് (26), റോഷന്‍ കുമാര്‍ (25), സിപാഹി കുമാര്‍ എന്നിവര്‍ക്കാണ് പരിക്കേറ്റത്.
സംഭവത്തെ തുടര്‍ന്ന് പ്രദേശത്ത് പൊലീസ് നടത്തിയ പരിശോധനയില്‍ രണ്ട് ബുള്ളറ്റ് കേസിങ്ങുകള്‍ കണ്ടെടുത്തു. പരിക്കേറ്റവരെ വിദഗ്ധ ചികില്‍സയ്ക്കായി സമീപത്തെ സ്വകാര്യ ആശുപത്രിയില്‍ പ്രവേശിപ്പിച്ചു. വെടിവെയ്പ്പിനെ തുടര്‍ന്ന് അടിവയറ്റിന് പരിക്കേറ്റ രണ്ടുപേരെ അടിയന്തര ശസ്ത്രക്രിയക്ക് വിധേയമാക്കിയിട്ടുണ്ട്.
പൂജ നടക്കുന്നതിനിടെയാണ് ആക്രമണം നടന്നത്. സംഭവത്തില്‍ പൊലീസ് അന്വേഷണം ആരംഭിച്ചിട്ടുണ്ട്. പ്രദേശത്ത് സുരക്ഷ ശക്തമാക്കിയിട്ടുണ്ടെന്നും റിപ്പോര്‍ട്ടുകള്‍ സൂചിപ്പിക്കുന്നു. ആക്രമണത്തിന്റെ കാരണം വ്യക്തമായിട്ടില്ല.
Story Highlights: Four injured in shooting at Durga Puja pandal in Bihar’s Arrah
