ബെംഗളൂരുവിലെ ചന്താപുരയിൽ മലയാളി കുടുംബത്തിന് നേരെ ഗുരുതരമായ ആക്രമണമുണ്ടായി. വയനാട് പുൽപ്പള്ളി സ്വദേശിയായ ആദർശിനും ബന്ധുക്കൾക്കുമാണ് ആക്രമണത്തിന് ഇരയായത്. സഹോദരിയെ ഹോസ്റ്റലിൽ കൊണ്ടുവിടാനെത്തിയ യുവാവിനെയും കൂടെയുണ്ടായിരുന്നവരെയും ഒരു സംഘം വളഞ്ഞിട്ട് മർദ്ദിക്കുകയായിരുന്നു.
ഇന്നലെ രാത്രി പന്ത്രണ്ട് മണിയോടെയാണ് സംഭവം നടന്നത്. നാരായണ ഹൃദയാലയ നഴ്സിങ് കോളജിലെ മൂന്നാം വർഷ വിദ്യാർത്ഥിനിയായ ആദർശിന്റെ സഹോദരിയെ ചന്താപുരയിലെ ബന്ധുവിന്റെ വീട്ടിൽ നിന്ന് ഭക്ഷണം കഴിപ്പിച്ച് ഹോസ്റ്റലിൽ തിരികെയെത്തിച്ചശേഷമാണ് ആദർശും കൂട്ടരും മടങ്ങിയത്. എന്നാൽ ഹോസ്റ്റൽ സമയം കഴിഞ്ഞെന്ന് പറഞ്ഞ് കെട്ടിട ഉടമയും മകനും പെൺകുട്ടിയെ തടഞ്ഞതോടെയാണ് പ്രശ്നങ്ങൾ ആരംഭിച്ചത്.
ഇതറിഞ്ഞ് തിരികെയെത്തിയ ആദർശിനോടും കൂടെയുണ്ടായിരുന്നവരോടും കാര്യം തിരക്കിയപ്പോൾ കെട്ടിട ഉടമയും സംഘവും ഇരുമ്പ് വടിയും കല്ലുകളും ഉപയോഗിച്ച് ആക്രമിക്കുകയായിരുന്നു. പൊലീസ് എത്തിയാണ് ഇവരെ രക്ഷപ്പെടുത്തിയത്. ആദർശിന്റെ പരാതിയിൽ സൂര്യ നഗർ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
Story Highlights: Malayali family assaulted in Bengaluru after dispute over hostel timings
