പോത്തന്‍കോട് മംഗലപുരം സ്റ്റേഷന്‍ പരിധികളില്‍ കഴിഞ്ഞ ദിവസം രാത്രി മൂന്നു ബൈക്കുകള്‍ കവര്‍ന്ന മൂന്നംഗ സംഘം പിടിയിലായി. വാവറയമ്പലം ആനയ്‌ക്കോട് സ്വദേശി ബിനോയ് (18), അണ്ടൂര്‍കോണം തെറ്റിച്ചിറ സ്വദേശി മയൂഖ് (21), പ്രായപൂര്‍ത്തിയാകാത്ത മറ്റൊരാള്‍ എന്നിവരാണ് അറസ്റ്റിലായത്. ഇവര്‍ പെട്രോള്‍ പമ്പിലെത്തിയപ്പോഴാണ് പൊലീസ് പിടികൂടിയത്.
ഒറ്റരാത്രിയില്‍ മൂന്ന് വ്യത്യസ്ത സ്ഥലങ്ങളില്‍ നിന്നാണ് ബൈക്കുകള്‍ കവര്‍ന്നത്. പോത്തന്‍കോട് തച്ചപ്പള്ളിയിലെ സിയാദിന്റെയും, മേലേവിളയില്‍ പഞ്ചായത്തംഗത്തിന്റെയും വീടിന് മുന്നില്‍ നിന്ന് രണ്ടു ബൈക്കുകളും, മംഗലപുരം സ്റ്റേഷന്‍ പരിധിയിലെ കുന്നിനകത്തെ അഭിലാഷിന്റെ വീട്ടില്‍ നിന്നും മറ്റൊരു ബൈക്കും കവര്‍ന്നു. ഒരു ബൈക്കിലെത്തിയ മൂന്നംഗ സംഘമാണ് ഈ മോഷണം നടത്തിയത്.
പൊലീസ് CCTV ദൃശ്യങ്ങള്‍ പരിശോധിച്ചുവരുന്നതിനിടെയാണ് പ്രതികള്‍ പിടിയിലായത്. മോഷ്ടിച്ച മൂന്നു ബൈക്കുകളും കണ്ടെത്തി കസ്റ്റഡിയിലെടുത്തു. പോത്തന്‍കോട് മംഗലപുരം സ്റ്റേഷനുകളിലായി മൂന്നു കേസുകള്‍ രജിസ്റ്റര്‍ ചെയ്തിട്ടുണ്ട്. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തതായി പൊലീസ് അറിയിച്ചു.
Story Highlights: Three-member gang arrested for stealing three bikes in one night in Pothencode and Mangalapuram areas
