ചെന്നൈയിൽ പ്ലസ് വൺ വിദ്യാർഥിനിയെ തട്ടിക്കൊണ്ടുപോയി കൂട്ടബലാത്സംഗത്തിനിരയാക്കിയ സംഭവത്തിൽ മൂന്ന് പ്രതികളെ പൊലീസ് അറസ്റ്റ് ചെയ്തു. 23 വയസ്സുകാരനായ സുന്ദർ എന്നയാളും പ്രായപൂർത്തിയാകാത്ത രണ്ട് ആൺകുട്ടികളുമാണ് പിടിയിലായത്. ചെന്നൈയ്ക്കടുത്തുള്ള തായമ്പൂരിലാണ് കഴിഞ്ഞ വെള്ളിയാഴ്ച വൈകിട്ട് ഈ ക്രൂരകൃത്യം നടന്നത്.
എന്നും വൈകിട്ട് സ്കൂൾ വിട്ടശേഷം ട്യൂഷൻ ക്ലാസിൽ പോകുന്ന പെൺകുട്ടി രാത്രി 7.30-ഓടെയാണ് സാധാരണ വീട്ടിലെത്താറുള്ളത്. എന്നാൽ വെള്ളിയാഴ്ച രാത്രി 9 മണിയോടെയാണ് പെൺകുട്ടി ദേഹമാസകലം പരിക്കേറ്റ്, വസ്ത്രങ്ങൾ കീറിപ്പറിഞ്ഞ നിലയിൽ വീട്ടിലെത്തിയത്. വീട്ടുകാർ ഉടൻതന്നെ കുട്ടിയെ ആശുപത്രിയിൽ പ്രവേശിപ്പിക്കുകയും പൊലീസിൽ പരാതി നൽകുകയും ചെയ്തു.
പൊലീസ് അന്വേഷണത്തിൽ, വീടിന് അരക്കിലോമീറ്റർ അകലെവെച്ചാണ് പ്രതികൾ പെൺകുട്ടിയെ തട്ടിക്കൊണ്ടുപോയതെന്ന് വ്യക്തമായി. തുടർന്ന് ആളൊഴിഞ്ഞ സ്ഥലത്തേക്ക് കൊണ്ടുപോയി തുടർച്ചയായി ബലാത്സംഗത്തിനിരയാക്കുകയായിരുന്നു. ഇതിനിടെ പെൺകുട്ടി ബോധരഹിതയായി. പിന്നീട് ബോധം വീണ്ടെടുത്തതിന് ശേഷമാണ് പെൺകുട്ടി രക്ഷപ്പെട്ട് വീട്ടിലെത്തിയതെന്നും പൊലീസ് അറിയിച്ചു.
Story Highlights: Police arrest three accused, including two minors, for kidnapping and gang-raping a plus one student in Chennai
