യുകെയിൽ ഇന്ത്യൻ റെസ്റ്റോറന്റ് മാനേജറെ കൊലപ്പെടുത്തിയ കേസിൽ പാകിസ്ഥാൻ വംശജനായ പ്രതിക്ക് ജയിൽ ശിക്ഷ വിധിച്ചു. 36 വയസ്സുകാരനായ വിഗ്നേഷ് പട്ടാഭിരാമനാണ് കൊല്ലപ്പെട്ടത്. 25 വയസ്സുകാരനായ ഷാസെദ് ഖാലിദാണ് കുറ്റവാളിയെന്ന് തെളിഞ്ഞത്. 2023 ഫെബ്രുവരി 14-നാണ് കൊലപാതകം നടന്നത്. യുകെയിലെ ഇന്ത്യൻ റെസ്റ്റോറന്റായ വേലിലെ ജീവനക്കാരനായിരുന്നു വിഗ്നേഷ്.
ജോലി കഴിഞ്ഞ് സൈക്കിളിൽ താമസസ്ഥലത്തേക്ക് പോകുമ്പോഴാണ് മോഷ്ടിച്ച കാറിലെത്തിയ ഷാസെദ് ഖാലിദ് അടക്കമുള്ള സംഘം വിഗ്നേഷിനെ ഇടിച്ചു വീഴ്ത്തിയത്. പരിക്കേറ്റ വിഗ്നേഷിനെ ആശുപത്രിയിൽ എത്തിച്ചെങ്കിലും മരണമടഞ്ഞു. ഫെബ്രുവരി 19-ന് തന്നെ സംഭവത്തിൽ ഷാസെദ് ഖാലിദ് പിടിയിലായി. റീഡിങ് ക്രൗൺ കോടതിയിൽ 28 ദിവസത്തോളം നീണ്ട വിചാരണയ്ക്ക് ശേഷമാണ് പ്രതി കുറ്റവാളിയാണെന്ന് തെളിഞ്ഞത്.
ഖാലിദിനൊപ്പം സംഭവ സമയത്ത് ഉണ്ടായിരുന്ന 27 വയസ്സുകാരനായ സൊയീം ഹുസൈനും മൈയ റൈലിയും കേസിൽ പ്രതികളായിരുന്നു. മൈയ റൈലിയെ കോടതി വെറുതെ വിട്ടപ്പോൾ സൊയീം ഹുസൈനെ കുറ്റക്കാരനെന്ന് വിധിച്ചു. വിചാരണയുടെ ആദ്യ ഘട്ടത്തിൽ കുറ്റം സമ്മതിച്ചാൽ കുറഞ്ഞ ശിക്ഷ നൽകാമെന്ന നിർദേശം ഖാലിദ് തള്ളിയിരുന്നു. പിന്നീട് വിചാരണ നടന്ന ശേഷം ജൂറിയാണ് ഖാലിദ് കുറ്റക്കാരനാണെന്ന് വിധിച്ചത്. ഇയാൾക്കുള്ള ശിക്ഷ ഒക്ടോബർ 10-ന് വിധിക്കും.
Story Highlights: Pakistani-origin man convicted of murdering Indian restaurant manager in UK
