തമിഴ്‌നാട്ടിലെ തിരുനെല്‍വേലിയില്‍ ഒരു ഞെട്ടിക്കുന്ന സംഭവം റിപ്പോര്‍ട്ട് ചെയ്യപ്പെട്ടു. മൂന്ന് വയസുകാരനായ സഞ്ജയ് എന്ന കുട്ടിയെ കഴുത്ത് ഞെരിച്ച് കൊലപ്പെടുത്തി, മൃതദേഹം വാഷിങ് മെഷീനില്‍ ഒളിപ്പിച്ച നിലയില്‍ കണ്ടെത്തി. രാധാപുരം സ്വദേശികളായ വിഘ്‌നേഷ് – രമ്യ ദമ്പതികളുടെ മകനാണ് കൊല്ലപ്പെട്ടത്. സമീപവാസിയായ തങ്കം എന്ന സ്ത്രീയെ പൊലീസ് അറസ്റ്റ് ചെയ്തു.
ഇന്ന് രാവിലെ ഒന്‍പതു മണിയോടെയാണ് കുട്ടിയെ കാണാതായത്. നാട്ടുകാര്‍ സമീപത്തെല്ലാം തിരഞ്ഞെങ്കിലും കണ്ടെത്താനായില്ല. തുടര്‍ന്ന് 12 മണിയോടെ പൊലീസില്‍ പരാതി നല്‍കി. പ്രദേശത്ത് സ്ഥിരം വഴക്കിടുന്ന തങ്കത്തിന്റെ വീട്ടില്‍ പരിശോധന നടത്താന്‍ ശ്രമിച്ചെങ്കിലും ആദ്യം അനുവദിച്ചില്ല. പിന്നീട് പൊലീസെത്തി വീട്ടിനുള്ളില്‍ തിരച്ചില്‍ നടത്തിയപ്പോഴാണ് ബെഡ്ഷീറ്റ് കൊണ്ട് മൂടി വാഷിങ് മെഷീനില്‍ ഒളിപ്പിച്ച നിലയില്‍ മൃതദേഹം കണ്ടെത്തിയത്.
പുറത്ത് കളിച്ചിരുന്ന കുട്ടിയെ എടുത്തു കൊണ്ട് വന്ന് കഴുത്ത് ഞെരിച്ച് കൊലപ്പെടുത്തുകയായിരുന്നുവെന്ന് തങ്കം പൊലീസിനോട് സമ്മതിച്ചു. ഇരു കുടുംബങ്ങള്‍ തമ്മിലുള്ള തര്‍ക്കമാണ് ഈ ദാരുണമായ സംഭവത്തിലേക്ക് നയിച്ചതെന്ന് റിപ്പോര്‍ട്ടുകള്‍ സൂചിപ്പിക്കുന്നു. മകന്‍ മരിച്ചതിന് ശേഷം തങ്കം ഒറ്റയ്ക്കായിരുന്നു താമസിച്ചിരുന്നത്. മൃതദേഹം കുഴിച്ചിടാനായി വീടിന് സമീപത്തെ തെങ്ങിന്‍ ചുവട്ടില്‍ കുഴിയും എടുത്തിരുന്നതായി കണ്ടെത്തി.
Story Highlights: 3-Year-Old Killed, Body Found In Neighbour’s Washing Machine In Tamil Nadu
