പ്രധാനമന്ത്രി നരേന്ദ്രമോദി വയനാട്ടിലെ ദുരന്തബാധിത പ്രദേശങ്ങളിൽ ഹെലികോപ്റ്റർ മുഖേന ആകാശ നിരീക്ഷണം നടത്തി. മുണ്ടക്കൈ, ചൂരൽമല, പുഞ്ചിരിമട്ടം മേഖലകളിലാണ് അദ്ദേഹം ഉരുൾപൊട്ടലുണ്ടായ പ്രദേശങ്ങൾ പരിശോധിച്ചത്. കൽപ്പറ്റയിൽ നിന്ന് റോഡ് മാർഗ്ഗം ദുരന്തഭൂമിയിലേക്ക് യാത്രതിരിച്ചു.
പ്രധാനമന്ത്രിക്കൊപ്പം കേരള മുഖ്യമന്ത്രി പിണറായി വിജയൻ, ഗവർണർ ആരിഫ് മുഹമ്മദ് ഖാൻ, കേന്ദ്രമന്ത്രി സുരേഷ് ഗോപി എന്നിവരുമുണ്ടായിരുന്നു. ആകാശ നിരീക്ഷണം പൂർത്തിയാക്കിയ ശേഷം കൽപ്പറ്റയിലെ എസ്കെഎംജെ സ്കൂൾ ഗ്രൗണ്ടിലാണ് ഹെലികോപ്റ്റർ ഇറങ്ങിയത്. മൂന്ന് ഹെലികോപ്റ്ററുകളായിരുന്നു ഉണ്ടായിരുന്നത്.
ആദ്യത്തെ ഹെലികോപ്റ്ററിൽ സുരക്ഷാ ഉദ്യോഗസ്ഥരും മീഡിയ സംഘവുമായിരുന്നു. എസ്കെഎംജെ സ്കൂൾ ഗ്രൗണ്ടിൽ ഇറങ്ങിയ പ്രധാനമന്ത്രി ഉടൻ തന്നെ റോഡ് മാർഗ്ഗം ചൂരൽമലയിലേക്ക് പുറപ്പെട്ടു. മൂന്ന് മണിവരെ ദുരന്തമേഖലയിൽ മോദി തുടരും. ദുരിതാശ്വാസ ക്യാംപുകളും ആശുപത്രികളും സന്ദർശിക്കുമെന്നാണ് പ്രതീക്ഷിക്കുന്നത്.
ഇന്ന് രാവിലെ 11 മണിയോടെയാണ് പ്രധാനമന്ത്രി കണ്ണൂർ വിമാനത്താവളത്തിലെത്തിയത്. എയർ ഇന്ത്യയുടെ പ്രത്യേക വിമാനത്തിലായിരുന്നു അദ്ദേഹത്തിന്റെ വരവ്.
Story Highlights: PM Modi conducts aerial survey of landslide-hit areas in Wayanad, Kerala.
Image Credit: twentyfournews
