വയനാട്ടിലെ മുണ്ടക്കൈ, ചൂരൽമല പ്രദേശങ്ങളിൽ സംഭവിച്ച ഉരുൾപൊട്ടലിൽ മരണമടഞ്ഞവരുടെ കുടുംബങ്ങൾക്ക് പ്രധാനമന്ത്രി നരേന്ദ്ര മോദി ധനസഹായം പ്രഖ്യാപിച്ചു. പ്രധാനമന്ത്രിയുടെ ദേശീയ ദുരിതാശ്വാസ നിധിയിൽ നിന്നും മരിച്ചവരുടെ കുടുംബങ്ങൾക്ക് 2 ലക്ഷം രൂപയും പരിക്കേറ്റവർക്ക് 50,000 രൂപയുമാണ് അനുവദിച്ചിരിക്കുന്നത്.
അതേസമയം, വയനാട്ടിൽ മരണസംഖ്യ 19 ആയി ഉയർന്നിരിക്കുകയാണ്. രക്ഷാപ്രവർത്തനങ്ങൾക്കായി എൻഡിആർഎഫ് സംഘം മുണ്ടക്കൈയിൽ എത്തിച്ചേർന്നു. കോഴിക്കോട് നിന്നും സൈന്യം തിരിച്ചിട്ടുണ്ട്. കൂടുതൽ പോലീസ് സേനയും സൈന്യവും വയനാട്ടിലേക്ക് എത്തുന്നുണ്ട്. എന്നാൽ, ചൂരൽമലയിൽ നിന്ന് മുണ്ടക്കൈയിലേക്കുള്ള പാലം ഒലിച്ചുപോയതിനാൽ രക്ഷാപ്രവർത്തനം വെല്ലുവിളി നേരിടുന്നു.
മേപ്പാടി പഞ്ചായത്തിലെ ചൂരൽമല ടൗണിൽ നിരവധി കടകൾ ഒലിച്ചുപോയതായും പുഴ ഗതിമാറി ഒഴുകിയതായും റിപ്പോർട്ടുകളുണ്ട്. വെള്ളാർമല സ്കൂൾ തകർന്നതായും, അവിടെ ദുരിതാശ്വാസ ക്യാമ്പ് പ്രവർത്തിച്ചിരുന്നതായും വിവരങ്ങൾ പുറത്തുവന്നു. അടിയന്തര സാഹചര്യങ്ങളിൽ ആരോഗ്യ സേവനം ലഭ്യമാക്കുന്നതിനായി 8086010833, 9656938689 എന്നീ കൺട്രോൾ റൂം നമ്പറുകളിൽ ബന്ധപ്പെടാവുന്നതാണ്.
Story Highlights: PM Modi announces financial aid for Wayanad landslide victims, rescue operations intensify as death toll rises
