കൊല്ലം ചടയമംഗലത്ത് സംഭവിച്ച ഒരു അപ്രതീക്ഷിത സംഭവം പോലീസിനെതിരെ ഗുരുതരമായ ആരോപണങ്ങൾക്ക് വഴിവെച്ചിരിക്കുകയാണ്. കാട്ടാക്കട പോലീസ് സംഘം പ്രതിയെ തേടിയെത്തിയപ്പോൾ ആളുമാറി ദമ്പതികളെ മർദ്ദിച്ചതായി പരാതി ഉയർന്നിരിക്കുന്നു. സുരേഷും ഭാര്യ ബിന്ദുവുമാണ് മർദനത്തിനിരയായത്. കാട്ടാക്കട എസ്.ഐ മനോജ് ഉൾപ്പെടെയുള്ള പോലീസുകാർക്കെതിരെ കൊല്ലം റൂറൽ എസ്.പിക്ക് പരാതി നൽകിയിട്ടുണ്ട്.
പരാതിയുടെ ഗൗരവം കണക്കിലെടുത്ത് കൊല്ലം റൂറൽ എസ്.പി അന്വേഷണത്തിന് ഉത്തരവിട്ടിട്ടുണ്ട്. കൊട്ടാരക്കര ഡിവൈഎസ്പിക്കാണ് അന്വേഷണ ചുമതല നൽകിയിരിക്കുന്നത്. ഡിവൈഎസ്പിയുടെ റിപ്പോർട്ടിന്റെ അടിസ്ഥാനത്തിലായിരിക്കും തുടർനടപടികൾ സ്വീകരിക്കുക. കഴിഞ്ഞദിവസം രാത്രി വീട്ടിലെത്തിയ പോലീസ് സംഘം സുരേഷിനെ മർദിക്കുകയായിരുന്നുവെന്നാണ് ആരോപണം.
സുരേഷിനെ വിലങ്ങണിയിച്ച് വസ്ത്രം വലിച്ചു കീറി ജീപ്പിൽ കയറ്റിയെന്നും, അദ്ദേഹം ബോധരഹിതനായിട്ടും പോലീസ് കൊണ്ടുപോയെന്നും ഭാര്യ നൽകിയ പരാതിയിൽ പറയുന്നു. പിന്നീട് സുരേഷിനെ വീടിനടുത്തുള്ള റോഡിൽ ഉപേക്ഷിച്ച നിലയിൽ കണ്ടെത്തി. കാട്ടാക്കട സ്റ്റേഷൻ പരിധിയിലെ വധശ്രമ കേസിലെ പ്രതിയെ അന്വേഷിച്ചാണ് പോലീസ് സംഘം ചടയമംഗലത്ത് എത്തിയതെന്നാണ് വിവരം.
