ടിപി ചന്ദ്രശേഖരൻ വധക്കേസ് പ്രതികളുടെ ശിക്ഷാ ഇളവ് പട്ടിക ചോർന്നതുമായി ബന്ധപ്പെട്ട് പൊലീസുകാർക്കെതിരെ നടപടിക്ക് നീക്കം ആരംഭിച്ചു. പാനൂർ, ചൊക്ലി സ്റ്റേഷനുകളിലെ സിപിഒമാരായ പ്രവീൺ, ഷാജു എന്നിവരെ കൂത്തുപറമ്പ് എസിപി ചോദ്യം ചെയ്തു. ഇവരിൽ നിന്നാണ് പട്ടിക ചോർന്നതെന്നാണ് പ്രാഥമിക നിഗമനം. കണ്ണൂർ സെൻട്രൽ ജയിൽ സൂപ്രണ്ട്, സിറ്റി പൊലീസ് കമ്മിഷണർക്ക് നൽകിയ പട്ടിക കണ്ണൂരിൽ നിന്ന് തന്നെയാണ് ചോർന്നതെന്ന് അന്വേഷണസംഘം കണ്ടെത്തി.
അതേസമയം, കെ.കെ രമയുടെ മൊഴിയെടുത്ത കൊളവല്ലൂർ സ്റ്റേഷനിലെ എഎസ്ഐ ശ്രീജിത്തിനെ വയനാട്ടിലേക്ക് സ്ഥലം മാറ്റി. ട്രൗസർ മനോജിന് ഇളവ് നൽകാനുള്ള നീക്കത്തിന്റെ ഭാഗമായിട്ടായിരുന്നു കെ.കെ.രമയുടെ മൊഴിയെടുത്തത്. ടിപി വധക്കേസിൽ നേരിട്ട് പങ്കാളികളായ ടി.കെ.രജീഷ്, അണ്ണൻ സിജിത്, മുഹമ്മദ് ഷാഫി എന്നിവർക്ക് ഇളവ് നൽകാനുള്ള നീക്കമാണ് വിവാദമായത്. പട്ടിക ചോർന്നത് എവിടെ നിന്നെന്ന് കണ്ടെത്താൻ ആഭ്യന്തരവകുപ്പ് അടിയന്തരമായി ഉത്തരവിട്ടിരുന്നു.
